Вуйлатыше паша гыч жаплан кораҥден кертеш мо?
Михаил.
Килемар район.
Килемар районын прокуроржо Алексей Михеев вашешта:
– Кертеш. Тидын нерген РФ Паша кодексын 76-шо статьяштыже возымо.
Мутлан, пашам темлыше паша деч тыгай пашаеҥым кораҥдышашак:
— тудо пашашке йӱшывуя, наркотик але вес аяр дене аҥырген толын;
— палемдыме радам почеш пашам аралыме (охрана труда) шотышто тунеммашым эртен огыл;
— медицине тергымашым, тыгак посна случайыште закон почеш палемдыме психиатрический освидетельствованийым эртен огыл;
— РФ Паша кодексыште федеральный законодательствыште да моло нормативный правовой актыште палемдыме случай годым.
Паша гыч кораҥдыме жапыште пашаеҥлан пашадар огеш тӱлалт. Но пашаеҥ шке титакшылан кӧра огыл медицине тергымашым эртен огыл да пашам аралыме шотышто тунемын огыл гын, паша гыч кораҥдыме жаплан тудлан пашадар тӱлалтшаш.