Шийвундо деч посна илаш йӧсӧ. Шонымо семын кочкаш-йӱаш, чияш, кӱлеш арверым, ешартыш шинчымашым налаш, ачалаш, корнышко тарванаш да тулеч моло кӱлешан пашам вораҥдарен колташ огеш лий. Самырык вате-марий-влаклан поснак неле: пачерымат налман, шочшым ончен-куштыман да шкаланат йол ӱмбалне пеҥгыдын шогыман. Тидлан кӧра шукын Москошко, Озаҥышке, Йӱдвелыш да моло кугу олашке пашам ышташ кудалыштыт, ала-кӧжӧ шке кундемыштыже оксам ыштен налаш йӧным муэш. Шочмо вершӧрыштӧ але кугу олалаште пашам ышташ сайрак? Тидын шотышто вашмутым кычалына.
Российыште тӱрлӧ профессий уло. Кӱшыл шинчымашан, паша профессиян южо специалистым чот аклат. Таче Российыште IT-специалист, юрист, адвокат, прокурор, экономист, финансист-бухгалтер, инженер-проектировщик, педагог, медик, маркетолог, чоҥышо, архитектор, геодезист, крановщик, машинист, маляр, газосварщик, врач, эколог, грузчик, сварщик, токарь, слесарь-сантехник, электромонтёр, курьер да молат кӱлыт.
Марий Элыште кызыт эн чот водитель, повар, продовольственный сатум ужалыше продавец, монтажник, слесарь, швея кӱлыт.
Российысе регионлаште пашадарын кугытшо тӱрлӧ. Ик вере шуко налыт гын, вес вере – шагалрак. Кажне регионышто илен лекташ ситыше эн изи кугыт уло. Пашадар туддеч шагал лийшаш огыл.
Марий Элыште пашам ыштыше еҥ-влаклан илен лекташ ситыше эн изи кугытшо – 13352 теҥге. А 1 июнь гыч эн изи пашадар кугыт – 15279 теҥге. Российыште илен лекташ кугыт эн кугу Чукотский АО-што (34593 теҥге), Камчатке крайыште (27493 теҥге), Ненецкий АО-што (27707 теҥге) да Магаданский областьыште (26400 теҥге).
Кугу олашке – ешге
Пачер йодыш шуко еҥым тургыжландара. Ешым чумырымеке, кажныжын шке сурт-печан але пачеран лийме шуэш. Кызыт ятыр вате-марий, ипотеке дене пайдаланен, пачерым налеш. Тыгай годым пашамат чот тыршен ыштыман, южгунамже пытартыш оксам луктын пуыман. А южыжын молын гае вигак пачеран лияш йӧнышт уке – айлен илат. Тидыжак йӱдшӧ-кечыже чоным туржеш да кугу олашке корным виктараш амалым луктеш. Палымем-влак коклаште тыгай еҥ-влак ятырын улыт. Нуно Москошко, Озаҥышке, Йӱдвелышке кудалыштыт.
Марий Турек район Сардаял гыч Вероника ден Алексей Никитинмыт (снимкыште) Тюмень областьысе Югорск олаште кок ий иленыт. Тушто пашам ыштыме жапыштак Йошкар-Олаште пачерым налыныт. Кызыт вате-марий рӱдолаште ила, кок йочам ончен-кушта. Алексей чоҥышылан тырша, Вероника – декрет канышыште.
Умбакыже 24 июньышто лекше номерыште лудса.