2-4 июньышто «Таир» тазаҥдыме да каныме рӱдерыште «Паша айдемым чапландарена!» («Славим человека труда!») республик кӱкшытан фестиваль лийын. Тудым Марий Эл Республикысе Туныктыш профсоюз организаций эртарен.
Фестивальыш образований отрасльыште тыршыше 25 тӱрлӧ профессиян еҥ погынен. Чылаже 286 еҥ йочашт, уныкашт дене каналташ толын.
Организатор-влак моткоч оҥай да пайдале каныме программым ямдыленыт. Ола мучко экскурсий дене коштыктеныт, «Таир» каныме рӱдерым пеледыш дене сӧрастареныт, социальный фондын представительже-влак дене вашлиймаш лийын, Я.Эшпай лӱмеш Марий филармонийын артистше-влак концерт дене куандареныт, спорт таҥасымаш-влак эртеныт. Кажне коллектив усталыкше дене палдарен.
Ты фестивальыште мыят лийынам. Кум кечаш каныш кужу жаплан шарнымашеш кодеш. Фестиваль эше ик гана пеҥгыдемдыш: кеч-могай профессият пайдале, кӱлешан. Тудым жапыштыже аклен, тауштен моштыман. Вет пырляште – вий!
Ольга Казанцева, воспитатель.
