Журналист да мер пашаеҥ, «Марий Эл» газетын ончычсо тÿҥ редакторжо Василий Матюшевын шочмыжлан 7 октябрьыште 80 ий теме. Тудым шарныме лÿмеш Юлсер кундемысе Карай кыдалаш школышто сылнымут пайремым эртареныт.
Лÿмлö еҥын ÿмыр корныжым шарналташ, пашаж дене палыме лияш школ коридорышто чумырымо выставке полшен. Сылнымут шагат эртыме жапыште тÿҥалтыш классыште тунемше йоча-влак почеламутым марла лудыныт, сценкым модын ончыктеныт.
— Кажне айдеме шке илыш корныштыжо могай-гынат сай пашам шукта, шочмо калыкше виян лийже манын шона. Южыжын тыгай надырже утларак лиеш. Тачысе шарналтыме еҥна — Василий Александрович Матюшев — литератур да журналистике корнышто виянак тыршен. Тидын годымак законодательный пашам шукташ жапым муын. Тудо Марий АССР Верховный Советын XI созывшын депутатше лийын, президиум председательын алмаштышыжлан ыштен. Тыгак рÿдö марий газетын коллектившым кужу жап вуйлатен. Шке суап пашаж дене марий калык культурым гына огыл, а кундемнам вияҥдаш полшен. Сандене тудым порын шарналтена, а тачысе пайремым чумырымылан Карай школ директорлан, коллектившылан тауштена, — каласен Волжский муниципальный район вуйлатыше В.Сергеев.
— Василий Александрович нерген мутланыме годым еҥ-влак эреак тыматле улмыжым палемдат. Тудын чурийыштыжак тиде возалтын: чонжо поро кумыл дене ташлалтше лийын. Кугу капан, ушан-шотан вуйлатышына шкенжым кеч-кунамат эре ласкан кучен. Тыгай койыш кызытсе илышыште поснак ок сите гай чучеш, сандене тидлан тудын деч тунемман. А кугу должностьыш тудо шке уш-акыл моштымашыж дене шуын: школышто моло деч эн чот тунемаш тыршыше лийын манмым колынам. Проста калык гыч лектын, илышын кажне йыжыҥыштыже пашам тыршен ыштен, санденак профессионал лийын, да Юлсер кунемна тыгай виян айдеме дене чаплана, — манын Карай школ директор Л.Сергеева.
Волжский район Эҥерÿмбал ялын шочшыжо В.Матюшев (1940-2006) Озаҥысе кугыжаныш университетын журналистике отделенийыштыже, Горький олаште Кÿшыл партийный школышто тунемын. Ныл ий «Волжская правда» районысо, 1969 ий гыч «Марий коммуна» газет редакцийлаште ыштен, 1987-1999 ийлаште тыштак тÿҥ редакторлан, Марий радио директорлан ыштен. Марий АССР-ын да Россий тÿвыран сулло пашаеҥже лÿм дене палемдалтын.
Л.ЕВСЮТКИНА.
