Брянск ола деч 12 меҥге ӧрдыжтӧ Снежеть эҥер серыште «Партизан алан» мемориал комплекс верланен. Лач ты верыште 1941 ий шыжым Брянскысе партизан отряд-влак иктеш чумыргеныт. А 1969 ий 17 сентябрьыште партизан-влакын шогымо верыште мемориал комплексым почмо. Проектын авторжо – Брянскысе архитектор В.Городков.
Брянскысе чодыраште оккупаций жапыште 27 партизан бригаде, 139 партизан отряд пашам ыштен, тушто 60 тӱжем утла еҥ шотлалтын.
Мемориал комплексыште Брянщинысе партизан толкынын историйже тоштер уло. Комплексын рӱдӧ монументше – Шарнымаш пырдыж, йошкар гранитеш 7700 утла колышо партизанын лӱмжым возымо. Герой-влакын аллейыштышт 14 партизанлан – Совет Ушем Герой-влаклан – той бюстым вераҥдыме. Тыгак партизан-влакын землянкыштым ужаш лиеш. Скипидар мастерскойыштым уэмден ыштыме. Кава йымалысе технике выставке уло. Курымашлык тулым партизан тулото семын келыштарыме.