Йошкар-Олаште «Единый Россий» партийын Марий кундемысе пöлкажым вуйлаташ секретарьлан Марий Эл Кугыжаныш Погын председательын алмаштышыже, МарНИИЯЛИ директор Евгений Кузьминым ойыреныт.
Партийын погынымаштыже республикысе чыла район да ола гыч делегат-влак лийыныт. Форумым почмо годым «Единый Россий» партийын Кÿшыл советшын еҥже, Марий Эл деч РФ Федераций Советын сенаторжо К.Косачев саламлен.
— Кодшо ийын партий сайлымаш кампанийыш Калык программе дене ушнен. Тудо кызытат мондалтын огыл, илышыш шыҥдаралтше манын, чылажат ышталтеш. Эн изи пашадар кугытым индексироватлыме, пашадарым кÿзыктымö дене пырля моло социальный йодышат шукталтеш.
Мемнан республикыште партийын 15 федеральный да эше кум верысе проект шукталтеш. «Оласе среда» программе дене келшышын, калыкын ойырымо почеш 2018-2021 ийлаште 449 кумдыкым тÿзатыме, чылаже 766 миллион теҥгеаш паша ышталтын. «Верысе тÿвыра пöрт» проект дене 87 тÿвыра пöртым олмыктымо да молат.
У вуйлатыше калыкын илышыжым куштылемдаш полшышо тыгай проект-влакым ончыкыжымат илышыш шыҥдараш тыршаш тÿҥалына манын, пашам ÿшанымылан тауштен ойлен.
ХХХ конференцийыштыже верысе исполком вуйлатыше-влакымат сайленыт.