«Eдиный Россий» партийын регионысо пӧлкажым вуйлаташ Марий Элым Вуйлатыше Ю.Зайцевлан темленыт. Тудын кандидатуржым «Eдиный Россий» партийын председательже Д.Медведев ден Генсовет секретарьже А.Турчак келшышылан шотленыт.
Вашлиймаш годым Д.Медведев палемден: ушем эн кӱшыл должностян еҥын кидыштыже лиеш гын, кугыжаныш да партийный ресурс тӱрлӧ проект ден программыш ушна, кӱкшӧ лектышыш шуэш. Тыгодым ешарен: тений регионышто сайлымаш кампаний-влак лийыт, тудо республикым вуйлатыше ден партийын секретарьжын эскерымышт дене эртаралтеш гын, путырак сай. А.Турчакын мутшо почеш, 2021 ийыште регионышто сайжак огыл лектышым ончыктен.
Ю.Зайцев республикым вуйлатыме ден партий пашам пырля сайын шукташ чыла йӧным кучылташ сӧрен.