Медведево район Кыдал Озакъял кундемыште калык коштмо икмыняр верым верысе инициативе программе почеш тӱзатыме. Кызыт тыште у проектым илышыш шыҥдарынешт.
Кыдал Озакъял ял шотан илемын рӱдывержылан шотлалтеш. Ялыште 720 еҥ ила, нунын коклаште йочасадыш да школыш коштшыжо 166 еҥыш погына.
Теве 2016 ийыште Кыдал Озакъял покшелне йоча площадкым самырык ава да районысо администрацийын полышышт дене пырля йӧнештарыме. Тудын воктене улшо мландым парк семын сӧрастараш шонымаш дене «Озакъял Мари» ТОС-ын (территориальный общественный организаций) советшын членже-влак Кыдал Озакъял илем администрацийыш лектыныт. Верысе самоуправлений орган тиддене келшен.
Чынжымак, паркым ыштыман. Вет тыште илыше да рӱдыверыш коштшо еҥ-влаклан тудо путырак кӱлешан. Еҥ-влак Кыдал Озакъял ял шотан администрацийыш але ФАП-ыш толын каят. Икшыве-влак школ-садыш коштыт. Тыгак ялыште кевыт уло, хоккей площадкым келыштарыме. Кум ий ончыч Кугу Отечественный сарын участникше-влаклан «Аллея Памяти» памятникым тӧрлатен почмо. Тылеч посна паркым ыштышаш верыште шуко пачашан да посна пӧрт-влак шинчат, туштат самырык ача-ава-влак ятырын илат.
Чыла тидым шотыш налын, Кыдал Озакъялын сай каныме верже лийже манын, паркым ышташ палемдыме. Ты проект почеш паркым печен налыт, йолешке да начар тазалыкан еҥ-влаклан келшен толшо корным ыштат, каналташ теҥгылым йӧнештарат, урно-влакым шындат. Ты поро пашашке ялыште илыше кумылан еҥ-влакымат ушаш шонат. Нуно пушеҥгым, вондерым шындат, пеледыш клумбо-влакым ыштат.
У парк «кушкын шогалеш» гын, Кыдал Озакъял мотор ял лиеш веле огыл, экологий да санитарный нормо почешат саемеш, 11 ял ден селам ушен шогышо вер шкешотан да калык коштмо сылне рӱдыверыш савырна.
Тиде проектыште модмо площадкым сӧралракым ыштыме нергенат ойлалтеш. Тушко 64 тонн мландым кондыман, тудым тӧремден, ужар газоным ыштыман, клумбым келыштарыман, пеледышым да изирак вондер-влакым шындыман.
Парк шуко пачашан пӧртла деч тораште огыл верлана, сандене кугурак ийготан йоча-влакым ача-авашт окна гычат ужын але умбачын эскерен кертыт. Ты площадкыште идалыкын кеч-могай жапыштыже модаш йӧным ыштат. Кеҥежым спорт снаряд дене заниматлаш, лӱҥгалтышыште лӱҥгалташ, ошмаште модаш лиеш, а телым – ий курык гыч мунчалташ да лум фигурым ыштылаш. Тыште оксам тӱлыман огыл, да мыняр кӱлеш, тунаре мод.
«Озакъял Мари» ТОС-ын советшын членже-влак администраций дене погынымашым эртареныт. Нуно тыште илыше-влак дене пырля «Отдыхаем всей деревней» проект дене верысе инициативе программыш ушнаш кутырен келшеныт. Верысе калык у паркыште кушкылым шындаш полшышаш. Мотор паркым вашке ужына манаш ӱшан уло.
Эльвира Терентьева.