Тений 6-13 сентябрьыште «ПараКрым» Российысе таҥасымашыш Марий кундем гыч вич спортсмен кая. Тиде – Медведево гыч Виталий Курзенёв, Шернур гыч Владимир Таникеев ден Евгений Данилов, Кужэҥер гыч Антон Глушков да Йошкар-Ола гыч Максим Новожилов.
В.Курзенёв, спортсмен:
– Мый икмыняр гана ынде тыгай таҥасымашыш миенам. Кодшо ийын штангым нӧлтымаш дене кумшо верым нальым, дартс дене – кокымшым. 2012 ийыште Сочиште лийын ыле, тунамат штангым нӧлтымӧ дене кумшо вер лийын. Тӱҥжӧ – результат. Вет «ПараКрым» культурно-спортивный фестиваль маналтеш, сандене ме шкенан кундемна, организацийна нерген каласкалена.