Кугу Отечественный сар годым 1941 ий 16 ноябрьыште Моском фашист тӱшка деч аралыме годым Дубосеково разъезд да Петелино ял тураште генерал Панфиловын дивизийже гыч 28 пехотинец 50 немыч танк ваштареш кредалмашке ушнен. Кредалмаш ныл шагат утла шуйнен, пехотинец-влак 18 танкым да ныл немыч дивизийым пытареныт, тыге тушманым чактарен кертыныт. Герой-панфиловец-влакын подвигышт историйыште кодын.
Совет Ушем Герой Иван Васильевич Панфиловын (1893-1941) лӱмжым Йошкар-Олан ик рӱдӧ уремжылан пуымо. Тудо Л.Чайкина изурем гыч тӱҥалеш да Герцен урем дене пыта.
Урем 1954 ийыште шочын. Тунам тиде изурем лийын, Жуковский изурем деч тӱҥалын да Кокшайск проезд дене пытен. Изурем транспорт магистральлан келшен толын. Сандене 1960-шо ийлаште тудым Первомайский урем марте шуеныт да шуко пачашан пӧрт-влакым чоҥеныт. Тыге лопка урем лийын.
