Волжский район Кӱшыл Азъялыште 14 июльышто весела, чоным тарватыше, кумылым нӧлтышӧ ял пайрем эртыш.
Пошкудо, родо, уна – чыланат, ваш-ваш порын вашлийын, икте-весылан сай деч сайым тыланен, чон канен мутланышт. Каныш программым районысо тӱвыра пӧлка (вуйлатыше – Л.А.Казакова) да Пӧтъял клуб пашаеҥ-влак вуйлатышышт Надежда Васканова дене пырля ямдыленыт.
Оҥай да куандарышыже теве мо: Кӱшыл Азъял калык тений ял деч тораште огыл верланыше Йӱштӧ памаш тураште леведышан верым келыштарен. Тидак пырля чумыргаш амалым пуэн. Сандене кечывал эрталтымек, эн ончыч чыланат ший вӱдан памаш воктеке погыненыт, юмыйӱла шотым шуктеныт. Морко черке гыч толшо Леонтий ача ден Корамас черке гыч Алексий ачам, чыла толшо калыкым кинде-шинчал дене вашлийыныт. Молебеным эртарымек, черке пашаеҥ-влак чылаштымат памаш вӱд дене чывылтен эртеныт.
Памаш воктен погынышо калык деке варажым Марий Эл Кугыжаныш Погын председательын алмаштышыже Л.Яковлева, Волжский район администрацийым вуйлатыше Т.Ильина, район муниципал образованийым вуйлатыше В.Сергеев, Марий книга савыктыш директор, Марий калык конгресс вуйлатыше, тиде ялынак шочшыжо Э.Иманаев, усталык пашаеҥ-влак ушнышт.
Пагалыме уна – Марий Элын калык, Российын сулло сӱретчыже Иван Ямбердов вершӧржымат, калыкшымат моктен ойлыш, а тудын ӱдыржӧ Татьяна Ямбердова скрипке дене «Яндар-яндар» калык муро, а вара шкенжын «Канде ӱжара» семым шокталтен, шке чон кумылжым почо. Ковыж кыл гыч лекше да памаш вӱд йогымо семын пырля йоҥгалтмыштым пеш шуэн колаш логалеш, сандене Азъял калыклан, чынжымак, тунам кугу пиал тат лийын.
Тиде кече, тиде кундем нерген чон гыч шолын лекше мут поэзий корнылашкат велалтын: поэтессе Лидия Иксанова «Каспий теҥыз тӱҥалтыште» поэмын ужашыжым памаш воктен лудын ончыктыш. Умылтараш уто огыл: Лидия Геннадьевна тылеч ончыч ты кундемыште лийын, ял шеҥгелне кугу келге коремыш йоген волышо ик памаш воктен тиде Каспий теҥызын тӱҥалтышыже манын, тудым ӱшандареныт. «Уке» манаш нигузе. Йӱштӧ памаш вӱдат Каспий марте шуэш чай.
Пайрем алан варажым Кӱшыл Азъял ял покшелне калыкым чумырен. Пагалыме уна-влак поро тыланымашым ойленыт, организатор-влак муро денат куандареныт, ойыртемалтше-влаклан пӧлекым ыштеныт, тыгодымак чыланат пырля муралтен-кушталтеныт. Верысе калык тамле чесым шуко ямдылен.
– Ял пайрем манаш тунемме гына, а такше тиде йоча годым модын куржталме, школыш пырля коштмо да кызытсе пошкудо-влакын икте-весе дене кутырымо йӧн. Санденак тыгай погынымаш шерге. Тӱнямбалне илыш пуламыр озалана гынат, вашлияш кӱлеш, тидат шке коклаште ӱшаным ешара, тынысле жапыш пӧртылмаште могай-гынат вийым пуа, – манеш Э.Иманаев.
Тиде кечынак ты кундемыште бард Геннадий Григорьевын «Ялем» мурыжлан (мутшо – Наталья Никифорован) видеоклип возалтын. Пайрем погынымаш ынде чынжымак кужу жаплан шарнымашеш кодеш да сай кумылым пӧлеклаш тӱҥалеш.
Мария Григорьева.
Авторын фотожо.