Шукерте огыл «Россия 1» телеканал дене «Цвет граната» фильмым ончыктышт. Тушто тӱҥ героиньым – Марина Соловьёвам – Анастасия Дворянская модын.
Анастасия Москошто, шуко шочшан ешыште (кум ӱдыр да кок эрге) шочын -кушкын. Ӱдырын усталык корныжо куштымаш гыч тӱҥалын. Тудо элыштына кумдан палыме Todes да Galla Dance студийлаште шуаралтын. Тыгак «Квадрат» театр-студийыште актёр мастарлыкшым таптен. Туштыжо Дворянская 46 спектакльыште рольым модын.
2013 ийыште «STARS» кино да шоу-бизнес академийыште тунемаш тӱҥалеш. Ты ийынак ӱдырын «Так просто» мурыжо шочеш. Варажым ты муро негызеш клипым войза. Тылеч вара Анастасиян репертуарже эше икмыняр муро дене пойдаралтеш. Нунын коклаште – палыме мурызо А.Воробьёв дене «Почувствуй мою любовь» дуэт. Палемдыман, Анастасия мурызын «ФркендЫ» музыкальный проектышкыже кастингым эрта. Тушто кызытсе илышлан келыштаралтше куштымаш трек-влакым шындат, сериал-влаклан саундтрекым войзат.
Фильмлаште Дворянская шукыж годым изирак планан роль-влакым модын. 2021 ийыште «Элли» фильмыште тӱҥ образым чоҥен. Тылеч вара актрисе «Призрачное счастье», «Чужая стая. Невидимый враг», «Просто Михалыч» проектлаште участвоватлен.
А.Дворянская личный илышыж нерген утыжым огеш палдаре. Яра жапше годым профессиональный фотосессийыш кошташ йӧрата. Тыгак теҥыз воктене канаш, сноуборд да ече дене мунчалташ кумылан.
«Цвет граната» фильм гыч ыштыме скриншот.