27 июльышто Россий МЧС-ын Марий Элысе тӱҥ управленийыштыже пресс-
конференций эртаралтын. Тушто кеҥеж пагытыште лӱдыкшыдымылыкым
шуктымо нерген ойленыт.
Ӱмашсе тыгаяк жап дене таҥастарымаште тений пел ийыште Марий Элыште
28,4 процентлан шукырак пожар лийын. Икымше июльлан 672 пожарым регистрироватлыме (ӱмаште – 523), тушто 18 еҥ колен (ӱмаште – 23 еҥ), нунын коклаште – ик йоча, 24 еҥ сусырген, нунын коклаште – ийготыш шудымо вич еҥ.
Тул утларакшым илыме секторлаште ылыжын (40,6 процентше годым).
Кукшо шудым але шӱкым йӱлалтыме годымат ятыр пожар лийын (43
процент). Илыме секторлам ончалаш гын, шуко пачеран
да частный пӧртлаште, монча, леваш да гаражлаште тул ылыжын.
Пресс-конференций годым пожар лиймын амалже-влакымат палемден
коденыт:
– тулым шот дене огыл кучылтмылан кӧра (381 пожар), нунын коклаштак –
тамакым шупшмылан кӧра (62 пожар);
– электрооборудованийым кучылтмо годым правилым пудыртымылан кӧра
(131 пожар);
– 43 случай годым тулым оралтыш лӱмын чыкеныт;
– коҥга але шикш лекме тӱньыкыштӧ экшыклан кӧра (68 пожар);
– транспортный средства-влакым кучылтмо годым правилым пудыртымылан (33 пожар);
– производствышто оборудований шаланымылан кӧра (2 пожар);
– тӱрлӧ вещества але материал йӱлаш тӱҥалмылан кӧра (4 пожар);
– кӱдырчӧ рашкалтыме годым (2 пожар).
Тений йӱштылмӧ тургымлан республикыште 37 пляжым келыштарыме: 16 муниципальный пляж, йоча-влаклан тазалыкым пеҥгыдемдыме лагерьлаште – индеш пляж, каныме базылаште да санаторийлаште – 12 пляж. Ял шотан илемлаште 110 каныме верым ямдылыме.
Марий Элыште вӱд объектлаште тений ятыр еҥ колен. 26 июльлан вӱдыштӧ 21 туткар лийын, тушто 19 еҥ колен, нунын коклаште – ик йоча. Йӱштылмӧ тургым тӱҥалмеке, кандаш еҥ пуреҥгаен колен. Ӱмашсе тыгаяк жапыште вӱд объектлаште 18 туткар лийын, 16 еҥ колен (ик йоча). Йӱштылмӧ тургым годым 13 еҥ пуреҥгаен.
Вӱдыштӧ колымо случай-влакым ончалаш гын, 6 случайыште туткар йӱштылмӧ годым лийын (вич случайыштыже йӱшывуя йӱштылаш пуреныт). Колым кучымо годым куд еҥ пуренгаен, кум еҥ – камвочмылан кӧра. Ныл случай годым амалым рашемдыме огыл. Эн шуко еҥ Волжск олаште, Курыкмарий, Медведево да Советский районлаште колен.
Йӱштылмӧ годым лӱдыкшыдымылык правил нерген мондыман огыл:
– кочывӱдым йӱаш, йӱшывуя йӱштылаш пураш ок лий;
– вӱд воктене йӱштылаш пураш ок лий манын возыман щитым вераҥдыме гын, йӱштылаш ида пуро;
– палыдыме, йӱштылаш келыштарыдыме верлаште вӱдыш пурыман огыл;
– вӱдыштӧ буй-влакым вераҥдыме гын, нунын деч тораш ийын кайыман огыл;
– моторан, парусан да моло судно деке ийын мийыман огыл;
– катер, пуш, причал да келыштарыдыме моло вер гыч вӱдыш ида тӧрштӧ;
– серыште кагаз, янда да моло шӱкым ида кодо;
– вӱдыштӧ мече але моло спорт модыш дене лӱмын келыштарыме верыште гына модаш лиеш, вӱд йымак пурен, йӱштылшӧ еҥым мыскарам ыштен лӱдыктыман огыл;
– пуреҥгаем манын, еҥ-влакым ондалыман огыл;
– оҥа, пырня, автомашина орава камер да матрацлаште ийын кошташ ой лий.
Изирак судно-влак дене пайдаланыме годым туткар ынже лий манын, ятыр паша ышталтеш. Кугыжаныш инспектор-влак 173 рейдым да патрулированийым эртареныт да административный правам пудыртымо шотышто 107 протоколым ыштеныт, судном йӱшывуя виктарымылан кум еҥ шотышто пашам тарватыме.