13-24 октябрьыште Марий Элыште «Сообщи, где торгуют смертью» российысе акцийын кокымшо этапше эртаралтын.
Тидын годым Йошкар-Оласе туныктымо тӧнежлаште «Это должен знать каждый» антинаркотический стенд-влакым вераҥденыт. Чарла кремльыште рекламе сынан щитым, Тӱвыра да каныме рӱдӧ паркыште баннер-влакым шогалтеныт. Тушто Марий Элысе МВД-ште «ӱшан телефон» пашам ыштыме нергенат увертареныт.
Республикысе МВД-н наркотик дене пайдаланымым тергыме управленийын пашаеҥже-влак Йошкар-Олаште, Волжскышто туныктымо тӧнежлаште ӱдыр-рвезе-влак дене вашлийын кутыреныт. Профессиональный шинчымашым пуымо туныктымо тӧнежласе студент-шамыч дене «Серьёзный разговор» лӱман мероприятий-влак республикысе наркодиспансерыште эртаралтыныт. Тӱҥ шотышто наркотикым закондымын шаркалымылан мут кучымо нерген умылтареныт.
«Сообщи, где торгуют смертью» акцийын кокымшо этапше годым республикыште ийготыш шудымо ӱдыр-рвезе-влакын погынымо 219 верым тергыме. Ты жапыште еҥ-влак деч 59 обращений пурен, наркотикым закондымын шаркалыме шотышто 21 правонарушений да 25 преступлений нерген пален налме. Тыгак наркотик дене кылдалтше контентан интернет-сайтысе 12 адрес нерген уверым Роскомнадзорыш колтымо.
Марий Элысе МВД-н пресс-службыжын колтымо фото.