Екатерина Тетерина, Йошкар-Ола:
Медведево район Цибикнур ялыште сад-пакчам уло – 20 сотык. Уло кумылын чыла ончен-куштем. Росотам шке ыштем. Январьыштак эустомам ӱденам. Февральыште – петунийым, лобелиям, базиликым, томатым, шере ден кочо пурысым. Окнаште вер огеш сите. Кугу ӱстембалым, теҥгылым пӧлемлаш шарен шындылам. Утларакше пеледышым йӧратем. Моткоч шуко тӱрлӧ шукияш пеледыш-влакым шынденам – пазар воктеч эртен каен ом керт, кажне гана у пеледышым але вес кушкылым налам. Але пакчам ныл ияш веле, сандене саскам пуышо пушеҥгына шагал, но икмыняр олмам шкенаным ӱмаште кочкынна. Ончыкыжым шукырак шочеш, шонем. Тений иктаж ныл-вич тӱрлӧ розам шындынем. Пакча мылам куаным конда. Ялыште шочын-кушкынам, мланде пашам йӧратем. Шошым да кеҥежым кечылан кум гана пакчаште «обходым» ыштем: кажне кушкылым тӱслем, шымлем, нунын дене мутланем. Тау, Юмын пуымо тыгай пиаллан.