Пакчаштет мом ончен куштет?

Августа Романова, артистке, радиовӱдышӧ:

Шке садем ончыч ыле, но тушто мланде ошман. Вӱдым кеч-мыняр шаве – мланде эре кукшо. Садлан кызыт Нина акамын сад-пакчаштыже чонем кандарем. Тушто мыйын посна «кабинетем» уло (шке лукем). Эн кугу куан – монча.

Пӱртӱсыштӧ кошташ йӧратем. Телым 10 кече денат тушто шкет илем. Пеш келша.
Пакчасаска шотышто. Мутат уке, акамлан изин-кугун эре полшем. Росотам (помидор, кияр, шере пурыс) акам шке ышта. Тудын помидоржо поснак тамле да шуко лиеш. Пареҥгым ӱмаште шынден огынал. Мландым кандаренна. Тушко викам, пурсам ӱденна ыле. Мый шкаланем ик йыраҥеш шоганым, кешырым, чеснокым шындем. Кеҥежым мемнан каныме кудывечыштына шуко пеледыш чоннам куандара. Циний ден астра росотам шке ыштена. Паша кая, но вий-куатым шуко пыштыман. Чыла шотлет гын, пеш шергын шуэш. Кевытыште налаш шулдырак лектеш. Мыланем гын тӱҥжӧ – пӱртӱсыштӧ лиймаш, паша деч вара шокшо мончаште выньык дене капым да чоным кандараш. Ме вет ялысе улына! Мланде деч посна илен огына керт. Асфальт дене кыльдыр коштмеш, лучо ужар шудышто чарайолын коштам.

 А.Романован фотожо-влак