Лудшына-влак, пакча пашада кузерак кая? Могай пакчасаскам, пеледышым, пушеҥгым, вондерым шындеда?
Тамара РЫЖОВА, Морко район Ярансола:
– Сурт воктене 28 сотык кумдыкан пакчам уло. Ончыч тушто тичмашнек пареҥгым шынденна. Ынде икмыняр ий почела кугырак ужашыштыже шудым ӱдена. Кызыт 10 сотыкышто пакчасаскам куштена. Пареҥгым (кажне ийын иктаж 4-5 урлыкым), помидорым, кешырым, шоганым, йошкарушменым, кабачокым, ковыштам шындена. Икмыняр гана дыне ден арбузымат куштен онченна.
Вондер кокла гыч олмапу, вишне, сливе, йошкар ломбыгичке улыт. Тыгак шемшоптырым, пуншоптырым, йошкар да шем эҥыжым, мӧрым йӧратен кочкына. Икмыняр ий почела шем виноград куандара. Пеледышым: бархатцым, астрам, гладиолусым, георгиным да молымат – кажне ийын шындем. Кызыт пакчаште шоганым шынденна. Игече юалге, сандене молыжо эше шуэш, шонем. Мый такшат чыла варашрак шындем.
Роза КУДРЯШОВА, Морко район Ердӱр:
– Пакча пашам моткоч йӧратем. Ӱмаште шыжым пакчашкына теплицым поген шындышна. Тушто кызыт помидор ден шере пурыс, кияр пеледалтыныт. Ондакак ӱдымӧ укропым, редисым, салатым кочкына, луктын кочкаш шындыме шоган кушкын шуын. Теплицыштак росотам: дыньым, арбузым, ковыштам куштена, икияш пеледыш нӧшмым яшлыклаш ӱденна. Кодшо каныш кечылаште помидорым да кочо пурысым парникыш лукна. Кешырым ӱдымӧ, тыглай да севок шоганым, ондак шушо ковыштам шындыме. Шукияш пеледыш: тюльпан, лилий, нарцисс, лилейник, пион, роза, клематис – ятыр кушкыт. Кум тӱрлӧ виноградым шынденна. Йошкар, ош, шем эҥыж улыт. Тений жасминым да моторын пеледалтше спирея вондерым налын шындыме.
Алёна МИШУТОВА, Волжский район Сотнур:
– Пакчам кугу. Тений киярым, кешырым, ушменым шындаш шонем, но але пеш ночко, пакчаш пураш ок лий, вӱд веле шинча. Росотам шке ыштем. Ковыштам, помидорым ӱденам. Иктаж-кунам дыньым да арбузым шынден ончынем. Кок ий ончыч олмапум шындыме, тыгак эныж да вишне улыт. Шукияш пеледыш-влак суртнам сӧрастарат. Теплицем уке, налаш шонем.
Але илаш куснымо веле, садлан чылажымат изинизин ыштена.
«Кугарня» газет • 19 (1689) No • 2022 ий 13 май