Пайдале вашлиймаш

7 ноябрьыште Марий Элын вӱдышӧ спортсменже-влак дене рӱдоласе бизнес колледжыште студент-влак вашлийыныт. Вашлиймашын тӱҥ шонымашыже: студент-влакым таза илыш-йӱлам кучаш да спорт дене кылым пеҥгыдемдаш кумылаҥдаш.

Вашлиймаш годым спортсмен-влак спортыш толмышт, могай кӱкшытыш шумышт нерген каласкаленыт. Тыге Российын спорт мастерже, тайский бокс дене тӱнямбалын действующий чемпионкыжо Татьяна Петрова ты спорт нерген каласкален. Михаил Тарасов ден Вячеслав Демьянов (коктынат спортивный туризм дене Российын спорт мастерже улыт) спортивный туризм дене палдареныт. Тылеч посна тӱнямбал кӱкшытан спортсмен, Российын спорт мастерже, начарын ужшо-влак коклаште спортым вудышӧ тренер-влак Евгений Иванов ден Василий Николаев тренерын пашаже, икымше таҥасымаш нерген каласкаленыт.

Вашлиймаш моткоч пайдалын да ик шӱлыш дене эртен. Студент-влаклан пӧлек шотеш монографийым кучыктеныт. Туштыжо начарын ужшо-влак коклаште кӱшыл квалификациян футболистым кузе куштымо нерген радамлалтеш.