Лишыл еҥ-влак верч чыла ышташ ямде улыт
Алексей Ивановын «Пищеблок» книгаже кугурак класслаште тунемше ден студент-влаклан поснак оҥай. Авторын ты книгаже бестселлер-влакын топышкышт логалын. А советский вампир-влак нерген фильмым войзымек, еҥ-влак коклаште тудо эшеат чот йодмашан лийын.
А.Иванов лудшо еҥым 1980 ийыш пӧртылта. Тушто Олимпиадылан ямдылалтме тат, кеҥежымсе пионер лагерьын илышыж нерген ойлалтеш. Йоча ден вожатый-влак кокласе тӱрлӧ умылыдымаш, икшыве чонын мӧҥгӧ шупшмо кумылжо кугурак проблеме-шамыч ончылно несерьёзныйлан шотлалтыт. Книгасе герой-влак ожнысо осал – вампир-влак дене вашлийыт. Сюжетыште подростко-влакын чын йӧратымашышт ончыкталтеш. Йӧратымаш верч ӱдыр-рвезе-влак тӱрлӧ эҥгекыш логалашат ямде улыт.