Шукерте огыл Моско областьыште «Территория смыслов – 2023» Российысе форум эртаралтын. Тушко Волгатехын информатике да вычислительный технике факультетшын студентше Александр Крупин миен.
Мероприятийыш Российын тӱрлӧ кундемже гыч 350 наре самырык искусствовед, культуролог, блогер, тыгак каныме мероприятий-влакым ямдылыше индустрийын пашаеҥже-шамыч ушненыт.
Смене годым участник-влак командылаш чумыргеныт да «Айдеме», «Эл», «Еш», «Обществе», «Кугыжаныш» теме-шамычлан проектный решений-влакым ямдыленыт. Александр «Творить» сменыш логалын, тушто кум направлений почеш проект-влак дене пашам ыштен: текст, сӱрет да видео.
– Мый икоян командыш верештынам, ваш колыштын, умылен пашам ыштенна. Мероприятий нерген шуко сай шонымаш кодын, ятыр участник дене йолташ лийын шуктенна, чеверласымат шуын огыл, – форум нерген ойла Александр.