19-25 декабрьыште – пакчасаскам да фруктым кочмо нерген каласкалыме арня.
Пакчасаска ден фруктын пайдаштым научно пеҥгыдемдыме. Нунын составыштышт – 65-95 процент вӱд, 2 процент миниральный вещества, углевод, сакыр (глюкозо, фруктозо, сахарозо), крахмал, клетчатке, органический кислота, эфир, витамин.
Айдемын кажне кечысе рационыштыжо биологий могырым кӱлешан, аппетитым лукшо да тамле пакчасаска ден фрукт лийшаш улыт. Свежа кочкыш витаминлан, микроэлементлан да ферментный веществалан поян.
Фрукт ден пакчасаска организмыште вещества-влак вашталтмаш процессым саемдаш, шылым, колым да моло продуктымат шулыктараш, сокым лукташ, шолоралан сайын пашам ышташ полшат. Чеснокын, шоганын, кренын да моло кушкылынат фитонцидышт черле микроорганизм-влакын вияҥмыштым чактарат.
Пакчасаска ден фрукт изи калориян улыт, сандене нуным шуко кочкаш лиеш. Научно пеҥгыдемдыме нормо – кажне еҥлан кажне кечын 400 грамм марте. Тӱҥ шотышто 100 граммыште 10-100 ккал уло. Ӱян да белокан улмылан кӧра шукырак калорий пӱкшыштӧ – 600-700 ккал, финикыште – 281, маслиныште – 450-700, авокадошто – 230-400, консерван закускышто – 100-200.
Эн тӱҥ энергетический веществалан пӱртӱс сакыр шотлалтеш. Фруктышто тудо 2-25%, а пакчасаскаште – 0,5-12%. Эн шуко сакыр виноградыште, поснак коштымо сортлаштыже, уло, тыгак – бананыште, абрикосышто, персикыште, эн шагал – лимонышто.
Свежа фрукт ден пакчасаска иммунитетым пеҥгыдемдат, шукырак илаш да организмлан физически шуаралташ полшат.