Пагаршудо (сушеница) давленийым волта, вуй корштымым чара, лыпландара, сайын малаш полша. Шӱмын ишемический чержым, тахикардийым да стенокардийым эмла. Тыгак варикоз да кугу кислотностян гастрит годым пайдале. Пагарысе да нылгыжшоло (двенадцатиперстный) йорам паремда. Климакс куштылгынрак эрта. Тыгак гинекологий черым але простатитым куштылемдаш полша.
Лемым ямдылаш манын, пеллитр шокшо вӱдыш ик кугу совла коштымо тыгыдемдыме кушкылым пыштыман, пел шагат шинчыктыман, шӱрыман. Ты лемым, кок-кум ганалан пайлен, ик кечыште йӱман. Тыге кум арня эмлалтман.
Настойкым ышташ лиеш. Тидлан банкыш 50 грамм коштымо шудым пыштыман, пел литр ош аракам темыман. Кок арня шинчыктыман да шӱрыман. Настойкым ик изи совла дене кечеш кок гана изишак леве вӱд дене варен йӱман.
Мӱй дене варен кочкаш лиеш. Шудым порошок марте тыгыдемдыман. Лу совла мӱйым ик совла порошок дене иктеш сайын варыман. Холодильникыште аралыман. Ик изи совла дене кочмо деч ончыч кечеш кок гана кочман, леве вӱдым подылаш лиеш.
Пагаршудо лем дене сусырым, трофический йорам, экземым, дерматитым эмлаш лиеш. Сусыр верым лем дене кечеш ик-кок гана йыгалтыман.
Шотыш налза. Пагаршудо дене гипотоний, тромбофлебит (шудо вӱрым изиш нугыдемда), азам пукшымо, мӱшкыран улмо да брадикардий (шӱмын шуэн кырымыже) эмлалташ ок лий.