Пагалыме марий калык!

Пагалыме марий калык!

Поро лудшо йолташна-влак!

Кажне кугарнян ме тендан суртышкыда тӱкалтена, черетан у номер гоч шке куаннам намиен шукташ вашкена. Тыге идалыкысе 52 арня кӱчык жап гай эртен кая. Кече еда тендан деч толшо чон шокшымат шижын илена: возен колтымо серышда дене, южгунамже кок-кум мутан але икмыняр корнан комментарий денат редакцийыште тыршыше-влаклан паша вийым ешареда.

Тений гыч «Кугарня» газет эртыме корныштыжо у йыжыҥыш куснен манам гын, йоҥылыш ом лий, очыни. Вет ынде Йошкар-Ола покшелне редакцийын шке полатше уло. Сандене 2018 ий мыланна шкешотан пӧлекым ыштен. Калыкат тиде куаным шижше манын, кеҥежым «Какшан сер ӱмбалне» марий авторский муро фестивальым эртарышна. «Кугарнязе-влакын» юарлыше чоныштым почаш полшышо «Ах, Какшан» лӱман у муро шочо, ушышко шуко у сай шонымаш-влак толыт. Марий калыклан пайда утларак лийже манын, ончыкыжым ме тудым илышыш шыҥдараш шонена.

Эртыше идалыкыште республик деч ӧрдыжтӧ илыше марий-влак декат миен толмо: кеҥежым – Татарстаныш, декабрь тӱҥалтыште – Башкотростаныш. Шижына: те мемнам чыла вере вучеда, сандене йӧн лийме семын миен шуына.

У ий гыч газет вес тӱрлырак сынан лекташ тӱҥалеш. Тематикым кумдаҥдыме, содержанийым саемдыме шотышто журналист-влак эреак тыршат, тидлан кажне пашаеҥлан таушташ гына кодеш. Шижында, очыни, тений гыч возышына икмыняр у авторлан ешаралтын – чылажат газетым саемдаш. Сандене «Кугарням» лудшо-влак шукемыт, редакцийын эртарыме тӱрлӧ акцийыш калык эреак ушнаш тӱҥалеш манын ӱшанем. Тыге ме ончыкыжымат икте-весылан чон шокшынам утларак ситараш тӱҥалына, шонем.

У ий дене чыладамат саламлем! У идалык сай паша лектышым кондыжо!

Эдуард ИМАНАЕВ,

«Кугарня» газетын тӱҥ редакторжо.