Пачерлан, пенсийлан…

 

– Ава капитал дене мом ышташ лиеш?

И.Петрова.

Йошкар-Ола.

Марий Эл Республикысе прокурорын полышкалышыже Ольга Лаптева вашешта:

– Ава капиталым лач палемдыме цельлан гына кучылташ лиеш. Тидын нерген 2006 ий 29 декабрьыште лукмо 256-шо №-ан федеральный законын 1-ше статьяжын 2-шо ужашыштыже, 2-шо статьяште, 7-ше статьян 3-шо ужашыштыже, тыгак 2017 ий 28 декабрьыште лукмо 418-ше №-ан федеральный законын 1-ше статьяжын 2-шо ден 4-ше ужашыштыже ойлалтеш:

  • РФ-ште илыме верым саемдаш;
  • йочалан (йоча-влаклан) шинчымашым налаш;
  • авалан пенсийын накопительный ужашышкыже колташ;
  • инвалид йочалан иктаж сатум налаш але услугылан тӱлаш;
  • кокымшо йоча 2018 ий 1 январь деч вара шочын (але ашнаш налме кокымшо йоча лийын кертеш) кажне тылзын ужашыжым налаш лиеш.

Тӱҥ шотышто ава капиталым йочан шочмыж (ашнаш налме) деч вара кум ий эртымеке налаш лиеш. Но посна случайлаште ты окса дене ондакыракат пайдаланат. Мутлан, илыме верым налаш але чоҥаш налме кредитын (займын) тӱҥ парымжым але процентшым тӱлаш лиеш. Тыгак кокымшо йоча шочмо (ашнаш налме) годым кажне тылзын ава капиталын ужашыжым пуат.

Ава капиталым кучылтмо шотышто срок уке. Кызыт сертификатым налме срокым 2026 ий 31 декабрь марте шуйымо. Ава капиталым иканаште икмыняр цельланат кучылташ шотлан толеш. Мутлан, ик ужашыж дене илыме верым саемден кертыда, весыжым йочалан шинчымашым пуаш колтеда.

 

Э.Терентьева.