Тиде мый денем лу ий ончыч лийын. Тунам илышын тӱрлӧ семын мыйым тергымыжым сайынак умыленам. Пашаштем проблеме ыле, пелашем дене ойырленам, ачам колен, илалше авам черланен…
Авам ончаш шочмо суртыш пӧртылынам. Тошто пӧрт шӱдӧ ияш гынат, пеҥгыде лийын, тушто йӱк-йӱан шоктен, арвер-влак шке семынышт камвозыныт. Ты пӧртыштӧ йоча годсо жапем эртен, садлан тӱрлӧ йӱк-йӱанлан нимынярат тунемын шуын омыл.
Ик кастене диваныште книгам лудын киенам, авам мален. Пелйӱдым диван воктене пуйто кугу пырыс мырлаш тӱҥалын. Лӱдмем дене тӧрштен кынелынам. Диван йыр, йымалне ончыштынам, нимогай пырысым верештын омыл. Книгам ӧрдыжкӧ кораҥден, шып колыштын киенам. Тетла нимогай йӱк-йӱан шоктен огыл, оҥем ыреслен малаш возынам. Эрлашыжым тидын нерген шарналтенат омыл. Кастене молгунамсе семынак малымем деч ончыч книгам лудынам. Пелйӱд шумеке, адакат пырыс мырлаш тӱҥалын. Ик жап мырла, вара шыплана. Тыге икмыняр гана. Чот лӱдмем дене «Отче наш» молитвам ятыр гана йӱкын лудынам. Ты йӱдым сайын мален омыл. Эрдене сурт сомыл дене мо лийме нерген утыжым шонен омыл, но малаш вочмеке, вуйыштем лач пырысын мырлымыж нерген шоненам. Ты йӱдым нимогай молитва полшен сеҥен огыл, пырыс йӱдвошт мырлен. Кынелмеке, пошкудо ковайлан йӱк-йӱан нерген каласкаленам. Тудо мыйым ия толаштара манын да юмынвӱдым пуэн колтен. Йӱк-йӱаным колмеке, мом ойлыман да тудым кузе шыжыктыман каласен.
Пелйӱд шумеке, адакат саде пырыс мырлыме йӱк шокташ тӱҥалын. Пошкудын ойлымыж семынак ыштенам да чот сырымем дене пырдыжым эҥдылынам. Диваныш кӱзен шогалын, туврашым уло вием дене мушкынденам. Тошто туврашыште кугу рож кодын, тушечын тӱжем пачемыш чоҥештен лектын. Нуно мыйым тӱрлӧ вер гыч пӱшкылаш тӱҥалыныт. Кид йымалне южым свежаҥдыше баллончикым верештын, нуным аяртенам. Изиш лиймеке, рожым тӱткынрак шымлен ончалынам. Пачемыш-влак пӧрткоклаште шканышт пыжашым ыштеныт да иленыт. Очыни, нуно йӱдым веле малаш возыныт, тыгодым чот ызгеныт. Пӧртыштӧ пырыс мырлыме семын йӱк-йӱан шоктен.
Тылеч вара туврашым тӧрленам, пӧрт леведышым вашталтенам да пӧрткӧргыштат олмыктенам.
Игорь.
Морко посёлко.