Денис Шаблий, актёр, режиссёр, сценарист:
– Пелашем нерген ойлыман гын, тудын могай улмыжым муро корныла дене мурыман. Наталья дене луымшо классыште тунемме годым Шернурышто палыме лийынна. Тунамак чонем савырен. Тудо моткоч ныжыл, ласка, мыйым йӧратыше ӱдырамаш. Изи чоныштыжо аралалтше ты шижмашын кугытшо, очыни, теҥыз дечат кугу. Тыгак Наталья- сай ава. Южгунам, ятыр сомылым шуктымо годым, мемнан икшывына-влак улмо нерген монденат кертам, а пелашем ик ганат огеш мондо. Моткоч сай озавате, мыйын да икшывына-влак верч тургыжланыше. Ешым тамле кочкыш дене эреак куандара, арулыкым йӧрата. Кызыт — декретыште. Тудын гай еҥ пелен шужен от коло, тӱрлӧ чер дене от черлане. А могай Наталья мотор, ушым йомдараш лиеш! Пелашемлан келшыше эн тӱҥ эпитетше, очыни, тудо – мыйын!