Николай Изергин, мурызо:
– Пелашем Зоя Алексеевна (ӱдыр фамилийже – Зайцева) Марий Турек район Пумарий ял гыч. Профессийже дене медсестра.
1987 ийыште парням тодылынам да поликлиникыш хирург деке приёмыш каенам. Туштак Зоям икымше гана ужынам. Вара йолташ рвезе дене тӱшкагудыш тудын акаж деке миенна. Тушто кокымшо гана ты ӱдырым вашлийынам. Пел ий келшышна, вара сӱаным ыштышна. Ынде 35 ий икте-весым умылен, ваш келшен илена. Мылам Юмо тудым пуэн, пӱрымашемак, очыни. Мыйым умылен, шонымашем ончылгоч пален моштен.
Моло ӱдырамаш дене таҥастарымаште, пелашем туманлен огеш мошто. Шыма ӱдырамаш. Тидыжак мыланем келша. Воктеныже канаш лиеш. Иктаж-мо кӱлеш гын, шкеак куча да ышта. Тыгодым арулыкым йӧрата. Шарнем, ондак мушмо машина уке, кажне кечын вургемым мушкеш ыле. Тыгодым озавате семынат тӱрлӧ кочкышым ышташ йӧрата. Кеч-могай пайремлан сайынак ямдылалтеш. Уна толеш але огеш тол – садак ӱстелым тӱрлӧ чес дене тема.
Йӱдвелыште 20 утла ий иленна. Икте-весе дене каҥашен, Марий кундемышке ешге пӧртылынна.
8 Март пайремлан пӧлекым ямдылем. Мо кӱлешым эн ондак пален налам, вара пӧлекым ыштем.