Григорий Архипов, Э.Сапаев лӱмеш опер да балет академический театрын тӱҥ режиссёржо:
– Мыйын Юлия пелашем – пӱрымашемын пӧлекше. Тудо суртым арулыкышто, сӧраллыкыште куча. Чыла шотыштат тӱткӧ да ужын-шижын моштышо еҥ. Пелашем – Зодиакын палыж почеш Рак, сандене тудлан тӱняште нимо деч шергылан пӧртысӧ сай кумыл шотлалтеш. Юлиялан кӱлеш семынак полшаш тыршем. Чыным ойлаш гын, ешыштына утларакшым мый кочкаш шолтем, вет тамле кочкышым шолтымо паша сайынрак лектеш. А пелашемлан тӱҥжӧ – пӧртыштӧ яндар, мотор да чонлан келшышын лийже.
Юлия Череповец ола гыч. Туддене пырля Петрозаводскысо консерваторийыште тунемынна. Ме тушто палыме лийынна да мужыраҥынна. Кызыт Юлия Йоча сымыктыш школышто йоча-влакым академический вокаллан туныкта. Тунемшыже-шамычын ятыр сеҥымашышт уло.
Чыла ӱдырамашым 8 Март пайрем дене саламлем да пеҥгыде тазалыкым, еш пиалым тыланем. А ме тений Юлия дене 20 ий пырля илыме куаным пайремлаш тӱҥалына. Тидым фарфор сӱан маныт. Тынар жап пырля илыме тат фарфор семынак мыланна шерге.