Порылык тӱням утара. Воктенет поро чонан еҥ, родет, йолташет, пошкудет улыт гын, кеч-могай ойгым сеҥаш вий лектеш. Поро паша, шыма мут шортшо чоным эмлат…
26 февральыште Йошкар-Олаште илыше шуко шочшан Елена ден Андрей Тимоновмыт марий ешын кок пачашан пӧртышт йӱлен. Озавате ешыжлан кечывал кочкышым ямдылен, йоча-влак юарлен куржталыштыныт. Уда лиймым нимо шижтарен огыл. Но трукышто кок пожарный машина оралтышт воктеке толын шогалын.
– Чыла киносо гай лийын. Мый пареҥгым жаритленам, йоча-влак модыныт. Окнашке ончальым – ик пожарный машина чарныш, вара – кокымшо. Пожарный-влак мом ойлат, ом кол, лач кидышт дене лекса манын ончыктымыштым умылышым. Суртышто мый, ныл йочам (иктыже тунам школышто ыле), да пошкудо лийынна. Ӱмбал вургемым писын чиен, документым, телефоным налде, тӱгӧ куржын лекна. Ончена, пӧртын кокымшо пачашыже йӱла. Нимогай шикш пушым шижын огынал. Эртен кайыше поро еҥын пожарный-влакым ӱжмыжлан, МЧС пашаеҥ-влаклан тау! Тӱҥжӧ – чылан таза улына, – манеш озавате Елена Тимонова.
Тений еш пӧртым олмыкташ шонен улмаш. Суртоза тидлан тӱрлӧ ӱзгарым, чоҥымо материалым эркын наледен. Чыла тидым пӧртын лачак кокымшо пачашыштыже араленыт. Тылеч посна тушто шошо да кеҥеж вургем, йолчием, тӱрлӧ ӱзгар лийыныт. Тул чыла пытарен.
– Илыме пӧртнам кум ий ончыч налынна. Икымше ийын пӧртлан оксам тӱлен пытараш тыршенна. Кокымшо ийын визымше йочам вученна да автомашинанам шукырак веранлан вашталташ манын, оксам погенна. Тений олмыктымо пашам тӱҥалнена ыле. Но айдеме шонен пышта, Юмо кӱлеш семын вераҥда. Чон ойгынам, кумалмынам Юмо колын.
Умар Назарович – Юмылан ӱшаныше, черкыш коштшо пӧръеҥ. Юмо ваш полшаш, пагалаш кӱштен манын ойлен. Каласыман, ойгынам пален налмеке, шукын полышым пуэныт. Йошкар-Ола администраций пӧртым олмыктымо жаплан кок пӧлеман пачерым илаш ойырен. Тылеч посна шӱк орам поген лукташ манын, администраций 10 еҥан бригадым мыланна полшаш колтен. Пожар лиймеке, йолташна-влак мемнам Савинысе пӧртышкышт илаш пуртеныт. Марий Эл Правительствылан, Умар Назаровичлан, паша веремын директоржылан да пашаеҥже-влаклан, университетыште пырля тунемше йолташем-шамычлан, родо ден пошкудо-влаклан ешланна полышым пуышо, ӧрдыжеш коддымо чыла еҥлан кугу таум ойлена, – шинчавӱд йӧре манеш Елена.
ВИЧ ШОЧШАН ПИАЛАН ЕШ
Андрей ден Елена 2017 ийыште ешым погеныт. Андрей – боевой действийын участникше, тудо Чечняште служитлен. Кид-йолжо чыла пашалан толеш. Олмыктымо пашам ыштен мошта. Морко район Кораксолаште илыше оньыкуваж ден оньыкугызажлан озанлыкыште тӱрлым тӧрлаш полша. Йоча-влаклан мотор кугу лӱҥгалтышым ыштен. Елена, ешыште тудым Алёна маныт, «Камелот» кулинарийпекарньыште – пекарь. Кызыт мӧҥгыштӧ йоча-влак дене шинча.
Тимоновмыт ешыште вич икшыве кушкеш. Назар эргышт Йошкар-Оласе 15-ше номеран школышто икымше классыште тунемеш. Тиде ийын кокымшо йочашт – Варвара ӱдырышт – школыш каяш ямдылалтеш. Назар ден Варвара тылеч посна 2-шо №-ан йоча сымыктыш школышто фортепиано классыште тунемыт. Назар – икымше классыште, а Варвара посна занятийлаш коштеш. Ныл ияш Арина, кок ияш Вера да вич тылзаш Мира ӱдырышт ача-аван кумылыштым нӧлтат.
САЙ ЙӰЛА
Тимоновмыт еш – Юмылан ӱшаныше. Ача-ава йочаштым изинек поро лияш, Юмылан ӱшанаш туныктат. Кажне кечын библийым пырля лудыт, малаш вочмо деч ончыч юмылтат, коштмаш корнышто Юмо эре аралыже маныт. Еш йӱлаштат уло.
– Когыльым, кексым чӱчкыдын кӱэшташ тыршем. Руашым шындем веле, колоемвлак кухньыш полшаш толыт. Пытартыш гана мантым пырля ыштенна. Пошкудына – таджик еш. Ваш келшен илена. Нунын дечак тамле пловым да мантым ямдылаш тунемынам. Кастене тичмаш еш дене ӱстелтӧрыштӧ погынена да тамле чайым йӱын, кече кузе эртыме нерген мутланена. Каныш кечылаште пакчашкына лектына, да казанеш шурпам пелашем шолта. Яра жапыште пӱртӱс лоҥгаште, поснак ер воктене, пырля канаш йӧратена, – каласкала Алёна.
Кугу еш – шуко пиал. Вате-марий коклаште ваш умылымаш, пагалымаш, йӧратымаш улыт гын, йоча-влакат шыма, уста кушкыт.
Анастасия МИХАЙЛОВА.
Марий Элым Вуйлатышын прессслужбыжын,
И.Речкинын да еш альбом гыч налме фото-влак.