Эргым ялыште пӧртым чоҥаш кугыжаныш деч окса полышым налын. Тиде окса дене пӧртым ыштен да тушко илаш пурен. Тыгодымак еш социальный найм ойпидыш почеш пуымо пачерым ялысе администрацийлан пӧртылтен огыл. Кок пачеран тиде пӧртым аварийныйлан шотлымо. Пачерлан эргым чыла коммунальный роскотым, айлен илымыжлан оксам тӱлен шога. Тушеч выписатлалтмыже огеш шу. Эше аварийный пӧрт олмеш чоҥымо у пӧртыштӧ пачерым налнеже. Ял администраций эргымын ешыжым пачерже гыч луктын кертеш мо?
Валентина.
Медведево район.
Юрист Алексей Инородцев вашешта:
– Ялыште илыше еҥ, тидын шотыштак самырык еш да самырык специалист, федеральный целевой программе почеш пӧртым чоҥаш (налаш) социальный выплатым налын кертеш.
Тыгай еҥ илыме верым саемдаш кӱлмӧ шотышто учётышто шогышаш. РФ Жилищный кодексын 56-шо статьяже почеш, кугыжанышын пӧртым чоҥаш але налаш оксам пуымекыже, еш учёт гыч кораҥдалтеш.
Кугыжаныш деч налме социальный окса дене еш пӧртым чоҥен, илаш пурен (собственностьлан правам регистрироватлыме) гын, администрацийын туддеч социальный ойпидыш дене пуымо пачерым пӧртылташ йодаш праваже уло. Еш тидым ышташ тореш лиеш гын, верысе администраций тудым суд гоч пачер гыч луктын да регистраций учёт гыч кораҥден кертеш.