Ешыште мыняр шуко икшыве, ача-авалан тунар куан. Тидым Йошкар-Олаште илыше вате-марий Людмила Эриковна ден Алексей Витальевич Мельниковмыт сайын умылат, ныл шочшым ончен куштат.
Йошкар-Ола – лишыл, шерге
Вате-марий икте-весым йӧратен, аклен илат. Кеч-могай пашам, ешыште лекше нелылыкым пырля шинчын каҥашат. Тыге икойыш шуын моштат.
Людмила Эриковна Йошкар-Оласе радиомеханический техникумышто программистлан, варажым Волгатехыште экономистлан тунем лектын. Ынде икмыняр ий рӱдоласе Сбербанкыште оксам тӱлымӧ, тыгак клиент-влакын проблемыштым решатлыме пӧлкаште тырша. Кассыштат шинчаш логалеш. Пелашыже Алексей Викторович – опытан юрист.
– Мыйын ачам ден авам Шернур вел гыч улыт. Ешыште кум йоча лийынна. Ачам ден авам Кужэҥер посёлкыштат иленыт. Варажым Йошкар-Олашке кусненыт да ЗПП заводышто тыршаш тӱҥалыныт. Мый, эн пытартыш икшыве, Йошкар-Олаште шочын-кушкынам.
Алексей пелашем – руш, Ульяновский кундемыште шочын. Ача-аваже военный улыт. Киров кундемысе ик военный олаште иленыт, пашам ыштеныт. 1993 ийыште Йошкар-Олашке кусненыт. Тунам Алексей 14 ияш лийын.
Самырык пагытыште пӱрымаш икте-весынам ушен, келшаш тӱҥалынна. 2008 ийыште возалтынна. Пелашем – койыш-шоктышыжо дене ласка, тыматле пӧръеҥ, мыланем кугу эҥертыш. Чыла ачалыме пашам шкеак ышта, кидше чылалан толеш. Машинам шофёр гай сайын пала, кузе тӧрлышашым шинча. Кеч тидлан тудо тунемын огыл, – мане Людмила Мельникова.
Пӧртым чоҥат
Мельниковмыт вате-марийын пачерышт Йошкар-Олаште верланен. Тыгак нуно Медведево районысо Покровка ялыште кок пачашан пӧртым чоҥат. Тений чыла шотыш конден шуктат гын, пӧртыш илаш пураш лиеш.
Ты ялыште суртоза Алексей Викторовичын ача-аваже илат, сандене у суртым нунын воктене нӧлтеныт. Тидыже икте-весе дене йыгыре лияш, ваш полшаш манме шонымаш дене ышталтын. Такшым Мельниковмыт ялышке чӱчкыдын кудалыштыт, шоҥгыеҥ-влаклан эре полшат. Вет нуно изирак вольыкым ашнат, кайыквусымат кучат. Сандене коча-кова иктаж торашке тарваныме годым изирак озанлыкыштым эрге-шешкыштлан кеч-кунамат ӱшанен кодат. Кок еш пырля пакчагӧргым шында, кеч-могай пашам пырля ышта.
Маргарита, Максим, Макар, Аня…
Вате-марий кечыгут пашам ыштат, кастене уло яра жапыштым ӱдыр-эргыштлан пӧлеклат. 12 ияш Маргарита 6-шо классыште, 11 ияш Максим 5-ше классыште, 7 ияш Макар 1-ше классыште тунемыт, 6 ияш Аня йочасадышке коштеш. Йоча-влак тыршен тунемыт, кидпашам ыштат, тӱрлӧ когыльым, тортым кӱэшташ полшат. «Полион» йоча клубышко коштыт, школысо тӱрлӧ кружокышто шкеныштым тергат.
– Ты клубышто авиамодельым ышташ, фанер материал дене фигурко-влакым пӱчкедаш тунемыт. Тыге самолётым, посна модель-влакым луктыт. Тушко Маргарита, Максим, Макар кодшо ийын гына кошташ тӱҥалыныт.
Маргарита книгам лудаш йӧрата. Кушкын шуын, ветеринарлан тунемаш каяш шона. Тыгак школысо дзюдо секцийышке, кидпашам ыштыме кружокышко коштеш. Максим акаж семын дзюдо секцийыште заниматла.
Макар вич ияшак изипила да чӧгыт дене пайдаланен мошта. Лётчик лияш шона.
Аня сценкылаште модаш йӧрата. Сандене ончыкылыклан тудым театральный кружокышко колташ шонена.
Йоча-влак эре икте-весылан эҥертат, полышкалат. Кӱмыж-совлам мушкыт, яндарлыкым эскерат, кочкашат шолташ тунемыт, – ойла Л.Мельникова.
Сай озавате
Людмила Эриковна тӱрлӧ шере кочкышым ыштен мошта, тидлан тудо шочшыжо-влакымат туныкта. Пырля нуно тортым, когыльым, кексым, печеньым кӱэштыт, бургерым ыштат. Тӱрлӧ салатым ямдылат.
Озавате – тале кидмастар. Жапыштыже шуко вургемым пидын, тӱрлӧ пушкыдо модышым урген. Тудо йоча-влаклан У ий пайремлан (Гномикым, Павлиным, Ковыштам…)тӱрлӧ сынан костюм-влакым ятыр ий урга. Но ик вургемжымат оксала огеш ужале. Йодшо-влаклан жаплан пуа, палыме-влак – йӧршешлан.
Ты еш чонышто поро, волгыдо кышам кодыш. Нуно кӧргӧ вий-куатан, илышлан куанен моштышо, келге шинчымашан улыт. Йоча-влак дене театрышке коштыт, теҥыз воктеке канаш миен толыт.