Пӧртылмышт верч кумалыныт

30 апрельыште Советский район Янгранур ял воктенысе отышто специальный военный операцийыште кредалше-влак верч кумалыныт.

Пӱнчеран отышто ик тулолмо дене Курык Кугызалан кандаш онаеҥ кумал шоген. Нуно тӱҥ онаеҥ Александр Таныгинын вуйлатымыж почеш пелештен шогеныт.  Онаеҥ-влак салтакыш тичмаш капкыл дене каен, таза пӧртылаш манын, Сурт-Юмылан чокленыт.

Эше кодшо шошым Советский районышто мобилизоватлыме еҥ-влак лӱмеш кумалтыш эртаралтын. Нуно шукынжо йӧршешлан пӧртылыныт, южышт сусыргеныт.

Кумалтышыш тӱрлӧ вер гыч 100 утла еҥ погынен толын. Кужэҥер, У Торъял район гыч поснак шукын лийыныт. 35 еҥ чес пӧлеклан комбо ден лудым конден. Руясола гыч фермер С.А.Гусев кок тагам пуэн. Тыгак Кодам вел еҥ-влак надырлан презым пуэныт. Вет тыште шошо агам эртараш комбайнёр, тракторист да шофёр-влак огыт сите, сандене кайыше-влак писынрак пӧртылышт манын ойленыт.

Кажне район гыч СВО-што улшо-влакын спискыштым посна лудыныт. Онаеҥ-влак ты кундем гыч кайыше еҥ-влак сай-таза пӧртылышт манын кумалыныт.

Эльвира Терентьева.

Римма Зайцеван фотожо.