3 мартыште Ир пӱртӱсын тӱнямбал кечыжым палемдыме. Марий кундемнат пӱртӱс сӧраллыкше дене шуко еҥын кумылжым налеш. Йомакысе да тыгодым чоным луштарыше, вийым пуышо вер. Айдемын тӱкыдымӧ сылне вержат шуко.
А те пӱртӱсыштӧ лияш йӧратеда мо? Мо дене тудо чондам сымыстара? Идалыкын могай пагытыштыже пӱртӱс тыланда эн чот келша?
Виктория Мочалова, мурызо:
– Пӱртӱсыштӧ лияш моткочак йӧратем. Моторлыкшо дене чонем сымыстара. Кажне пагыт шке семынже сӧрале да поян. Кунам пӱртӱс лоҥгаште коштат, чонет, вует канат, тыгодым шинча куана. Кайык-влакын мурымыштым колыштмеке, чыла ойгым, нелым мондет, вуйышто у шонымаш лектеш. Мыланем утларакшым кеҥежымсе пӱртӱс келша. Тунам игечат шокшо, шудо ужарге, пеледыш сылнын пеледеш.