3 мартыште Ир пӱртӱсын тӱнямбал кечыжым палемдыме. А те пӱртӱсыштӧ лияш йӧратеда мо? Мо дене тудо чондам сымыстара? Идалыкын могай пагытыштыже пӱртӱс тыланда эн чот келша?
Любовь Демьянова, тоштер пашаеҥ:
– Мый ялысе ӱдыр улам. Изи годсек пӱртӱс коклаште кушкынам. Шке шинчам дене ужынам, кузе олма туш кугу пушеҥгыш савырнен. Пӱртӱс деч посна илышемат ом уж. Кожлаш пий дене пырля кошташ йӧратем. Чодырашке пурем, мландыш возам да тудым колышташ тӱҥалам. Колам, кузе лышташ тарванылеш, мардеж пуалеш, тӱрлӧ кайык мура. Пӱртӱсын вашталтмыжак чонем сымыстара.
Тӱрлӧ емыж-саскам, чайлан шудым погаш йӧратем.