3 мартыште Ир пӱртӱсын тӱнямбал кечыжым палемдыме. А те пӱртӱсыштӧ лияш йӧратеда мо? Мо дене тудо чондам сымыстара? Идалыкын могай пагытыштыже пӱртӱс тыланда эн чот келша?
Виктория Матвеева, поэтессе:
– Ме вет шукынжо ял гыч, пӱртӱс лоҥгаште шочын-кушшо улына. А ялыште пакча шеҥгеке вел лек – йырым-йыр сӧрал. Садлан дыр, шочмо вершӧрыш толмеке, кужу жап ял йыр савырнен ончышт коштам. А мемнан марий пӱртӱснан шке йомакше улак, тора гыч толмеке, тиде утыр шижалтеш.
Пӱртӱсыштӧ мый ӱнардыме лияш ом ӧр. Илыш мемнан деч шукыж годым пеҥгыде койыш-шоктышым йодеш гын, а тыште чоным луштараш сай. Тидын денак пӱртӱс мыйым эн ончычак сымыстарен.
Чыла пагытшат, чынжымак, ойыртемалтше. Но мылам шыже путырак келша: ончыч шке поян шӧртньӧ тӱсшӧ дене, варажым пуста, тымык, но тыгодымак лыпландарыше игечыж дене. Ала шыжым шочынам да тудо мылам лишылрак чучеш.