21 декабрьыште Марий Элым Вуйлатыше Семёновка селасе школ-интернатысе ӱдыр-рвезе-влакым шушаш У ий дене саламлен.
Ю.Зайцев тыгак школ-интернатын уэмдыме кочмыверже ден тунемме класслажым ончен коштын.
Тений апрельыште школ-интернат оралтын туврашышкыже тул пижын ыле. Республикысе Правительствын резервный фондшо гыч олмыктымо пашалан 46,5 млн наре теҥгем ойырымо окса дене оралте кӧргысӧ чыла гаяк пӧлемым уэмдыме. Леведышым олмыктеныт, класслаште, коридорышто, туныктымо да малыме корпуслаште, актовый залыште, спортзалыште, кухньышто да кочмыверыште отделке пашам ыштеныт.
Актовый залыште эртаралтше пайрем годым Ю.Зайцев йоча-влакым саламлен да шере пӧлекым кучыктен.