Сотнур селасе участковый эмлымверыште Николай Николаевич Росляков пӱй врачлан пашам ышта. Пÿйым эмлаш Сотнурыш шым Корамас, шым Шайра, Ярамарий, Пӧтъял, Карай, Учимсола кундемлаште илыше-влак коштыт.
«Пеш кугу таум ойлынем Николай Николаевичлан. Йÿдым малыде эртараш логале, а тудо тыге сайын, корштыктыде пÿэмым лукто. Сотнурыш толмек, опытан врач-стоматолог порын шыргыжалын вашлие. Креслыш шындышат, «Кудо пÿэт йӱдвошт орландарыш?» манын, мыскарам ыштен йодо. Уколым шындышат, вигак шке пашажлан пиже. Шижынат шым шукто, корштышо пÿэм луктынат шуыш. Шонем: тыге опытан врач гына ыштен кертеш, – чон почын ойла йолташем, Курмузак ялыште илыше пашан ветеранже Михаил Александров.
Мый шкежат Н.Росляков деке ятыр гана миенам. Кажне гана опытан врач-стоматолог мылам кӱлешан полышым пуэн. Мыят тудлан чон гыч лекше таумутым пӧлеклем.
Николай Николаевич кажне кечын Карай ялже гыч Сотнурыш коштеш. Шке пашажым йоратен шуктен шога.
Йöратат да пагалат тудым пациент-влак веле огыл, тыгак коллегыже-влакат. Нунымат врач ятыр гана эмлен. Сотнур участковый эмлымверын тӱҥ врачше С.Н.Антонов тыгерак каласыш: «Николай Николаевич – мут колыштшо, шке пашажым сайын да жапыштыже шуктен шогышо врач. Шке шинчымашыжым тӱрлӧ курслаште эре ешарен шога, шке гычат ятыр литературым лудеш. Илыш дене тӧр ошкылеш. Черлым эмлаш шке кабинетыштыже чыла йӧным ыштен: бар, пӱйым эмлыме да лукмо технике, машинкыже жаплан келшыше улыт.
Н.Росляков школым тунем лекмек, Озаҥысе медицине институтыш тунемаш пурен. Тыршен тунемын, стипендийым налын. 1991 ийыште Волжск оласе больницыште интернатурым эртен. Вара тыштак икмыняр ий стоматологлан тыршен.
Сотнурыш пашаш шке кумылын толын. Шкеж нерген тудо шуко ойлаш ок йӧрате, моткоч скромный, шыма айдеме. Кабинетше воктен кажне кечын черет. Кажнылан жапым муэш, эмла. Суткаште тудлан мыняр таумутым колаш логалеш!
Умбакыжат пашат тек ушнен толеш, пагалыме Николай Николаевич.
А.Сапаев. Волжский район.
Л.Алексееван фотожо.