Пӱчмышудо (тысячелистник) лышташ гыч сокым пунчал налыт да вӱр йогымым чараш, кужун парем кертдыме шӱйшӧ сусырым, йорам эмлаш кучылтыт. Эмганыше верыш свежа тыгыдемдыме лышташымат пышташ лиеш. Пеледышым чай семын шолтат да вӱр дене кокырымо, ӱдырамаш чер, цистит годым йӱыт. Шудо лемым спринцеванийланат, примочкыланат кучылташ лиеш.
Нер гыч вӱр йогымо годым свежа лышташым сайын туржман да кажне неррожыш чыкыман. Але сокым пунчал налаш да нерыш чӱчыкташ лиеш.
Экземыш пӱчмышудо дене ямдылыме пеҥгыде вартышым йыгыман. Компрессым ышташ лиеш. Тыгак лемым ик кугу совла дене кечеш кум гана йӱман.
Ӱп йогымо годым вуй коваштыш свежа сокым кечеш ик-кок гана кок арня йыгыман. Чот йогымымат чараш лиеш.
Кочкышым шулыктарыме пашам саемдаш манын, ик кугу совла шудо ӱмбак ик стакан шокшо вӱдым темыман, шокшын леведын, ик шагат шинчыктыман да шӱрыман. Лемым 1 кугу совла дене кочмо деч 20 минут ончыч кечеш кум гана йӱман. Ты лем гастрит, пагар йора, пушкедыктыме годым пайдале. Шекшгалта, шондыгалта пуалыныт гын, лемым ¼ стакан дене кечеш ныл гана кочмо деч ончыч йӱман.
Менструаций годым корштымо жапыште ик кугу совла пӱчмышудым, ик кугу совла калганым (лапчатка), ик кугу совла пырысшудым (валериана) иктеш варыман. Ик стакан шокшо вӱдыш кок изи совла шудо вартышым пыштыман, 20 минут шинчыктыман да шӱрыман. Лемым пел стакан дене кечеш ныл гана йӱман.