Пакчаште але клумбышто пелед шогалше роза эре моторын коеш. Но ты моторлык верч шагал огыл тыршыман. Розам ончен куштышо-влаклан икмыняр каҥашым темлена.
Шошым розан южо вургыштыжо тӱрлӧ тамгам шекланаш лиеш. Кӱрен але чевер-кына тамга-влак когаргыме да сусыр верыш инфекций логалме нерген шижтарат. Кушкылым арален кодаш манын, «черле» вургым пӱчкын кораҥдыман да кушкылым медный купорос раствор дене (10 л вӱдлан 100 г препарат) обрабатыватлыман.
Розан кошкышо вургыжым пӱчкедыман, тыге у иге ден лышташнер-влак утларак лектыт, варажым пеледышлыкат шукырак лиеш. Но тидым игечым ончен ыштыман: йӱдым кылмыктымым чарна гын веле (12 градус деч шокшырак годым) пӱчкедаш лиеш. Тыгодым теве мом шотыш налман:
– кушкылым сад-пакчаште кучылтмо секатор дене гына пӱчкедыман;
– ты сомылым кукшо игече годым шуктыман;
– лышташнер деч 1 сантиметрым коден, вургым пӱчкын кораҥдаш лиеш;
– пӱчмӧ верыш садовый варым йыгалтыман.
Розалан органический ӱяҥдыш келшен толеш. Мутлан, кажне кушкыл йымак 3 кг шӱйшӧ терысым але 100 г чыве терысым пышташ лиеш.
Минеральный ӱяҥдыш семын кажне кушкыл йымак 30 г аммиачный селитрым шавалтен кертыда. Розалан ломыж вӱдат пайдале. Тидлан 10 л вӱдыш 1 стакан ломыжым пыштен лугыман, тыгай ӱяҥдыш фосфор, калийлан поян.
Авторын фотожо.