Татьяна Пчёлкина, Морко район:
– Кугу арверым мумым ом шарне. Мыйын ковам тале поҥгызо лийын, чодыраш каен гын, ик ганат поҥго деч посна пӧртылын огыл. Мыйымат изинек тӱрлӧ вер дене палдарен, шарнен код манын.
Кушкын шумекем, ковамын ойлен кодымо верлашке поҥгылан кошташ тӱҥалынам, эреак лыҥ поген конденам. Икана ялысе ик пӧръеҥ мыйым йышт эскерен каен улмаш. Тудо ковамын поҥго верым сайын палымыж нерген шинчен. Тунам мый мӧҥгӧ ятыр поҥго дене пӧртылынам, а тудо садак изиш веле муын. Тидын нерген мыланем шкеак ойлен ыле. Эре тыге манам: «Еҥ шӧртньым муэш, а мый – поҥгым». Очыни, ты сомылым ышташ чот йӧратем, садлан.