Аля Бокова, Йошкар-Ола:
– Урем дене ошкылмем годым ушыштем чӱчкыдын шонымаш пӧрдеш: «Корнышто иктаж шергакан арверым муам гын, мом ыштем ыле?» Но тачысе кече марте нимом тыгайжым верештын омыл. Икана полисым муынам. Вара Йошкар-Оласе тӱрлӧ увер тӱшкаште тидын нерген увертаренам, но озаже лектын огыл. Икана кнопкан телефоным муынам, тудо блокировкан лийын. Садлан иктаж-кӧн йыҥгыртымыжым вученам. Ик жап гыч телефон озан родыжо йыҥгыртен, телефоным кычалыныт. Пӧртылтенам.
Мыйын шонымаште, мумо арвер дене ны поян, ны пиалан от лий. Садлан озажлан пуашак тыршыман. Мый шканем кодем гын, йӱд омем йӧршын йомеш ыле. Утыждене тургыжланен, шкем титаканлан шотлен кертам. Кызыт иктаж-мом уремыште муам гын, лучо эртен каем, шонем.