Шӱгарла гыч мӧҥгӧ нимом кондаш ок лий манын, арам огыл ойлат. Ынде тидлан мыят ӱшанем.
Тиде лу ий наре ончыч лийын. Шошым, мланде кошкымеке, коча-кованан, моло родынан шӱгарыштым ачалаш тарванышна. Вич ияш Катя шӱжарем нигӧ дене кодаш, да пырля нална. Печым чиялтыме, кукшо шудым удырымо, тидын годым Катя памятник-влакым ончен коштын.
Тудо йӱдымак шӱжарем мыйым шортын кычкырен (коктын ик пӧлемыште малена). «Мо лийын?» – манам. «Нигӧлан ом пу, мый ончычрак муынам!» – шке семынже вудыматен. Да омса воктенысе лукыш ончыктен, тушто ӱдыр шога, шӱгарлаште мумо модышым пӧртылташ йодеш, манын. Кечывалым шӱгарлаште коштмыж годым шӱжарем ик изи ӱдырын шӱгарже гыч пушкыдо изи маскам кӱсенешыже йыштак пыштен конден улмаш.
Эрдене ача-аваланна ты томаша нерген каласкалышым. Тудо кечынак шӱгарлаш кудална да модышым верышкыже пыштышна. Ты модышын «озаже» – ныл ияш ӱдыр. Тылеч вара шӱжаремлан шучко омо кончен огыл.
Елена, Советский район.
freepik сайт гыч налме фото.