Озакъял велне канаш сай

Рӱдола деч 20 меҥге тораште, Медведево район Кыдал Озакъял воктене, вич ий ончыч каныме верым ышташ тӱҥалме да «ЗаАзяково» манын лӱмдымӧ. Тыгай пашам Ирина Витальевна ден Вадим Николаевич Агафоновмыт тарватеныт. Ынде ты вершӧрым кажне ийын сылнештарен шогат.

Кодшо кечылаште ме, редакций пашаеҥ-влак, ты верым ончал толна. Энтузиаст В.Н.Агафонов мыланна экскурсийым шкеак эртарыш да тыште шуктымо паша нерген радамлен пуыш.

Турист-влаклан

Пӱртӱсыштӧ канаш ятыр йӧн ышталтын. Тысе кугу пӧртлашке газымат, тулымат пуртымо. Йӱр але шокшо деч шылаш кок рестораныш пурен, иктаж сийым тамлен але лудын шинче.

Такшым ты вершӧрыштӧ кум зоно уло. Эн ончычак, кугу капка гоч пурымеке, туристический зоныш логалына. Тушто канаш толшо-влаклан кум кугу пӧрт ден куд изи кудым (глэмпинг) ямдылыме. Нунын деч тораштак огыл душ ден шонданым посна зданийыште йӧнештарыме.

Воктенак пӱям ыштыме. Тудо сӧрал ерла койын шинча, тӱрлӧ вел гыч лишемаш пирс-влакым келыштарыме.

Пӱя моторлыклан гына огыл, тусо ик лукышто вейк-парк верланен. Тыште самырык-влак вӱд ӱмбалне вейкборд дене мунчалтат, трамплин гыч тӧрштылаш, вӱдыштӧ савырнаш монь тунемыт. Тылеч вара Юл эҥерыш але теҥызыш мунчалташ каят.

Экопаркым 2018 ий 22 июньышто почмо. Ты кечыланак пӱя гоч кӱварым ыштен шуктымо.

180 квадратный метр кумдыкышто верланыше «ЗаАзяково» паркыште куэ, каштан, писте, пызле да моло пушеҥгат моторланен шогылтыт. Тыште чылаже 1000 утла пушеҥгым шке шындыме. Лишыл жапыште каштан аллей кушкын шогалеш. Куэм оҥго дене шындыме, а тудын покшелныже – йога дене заниматлыме вер.

Пляжный волейболла модаш вер уло, эше пляжный футболлан пасум ыштен пытарыман. Телым ватрушко дене мунчалташ пу курыкым чоҥен шогалтыме.

Экоферме

«ЗаАзяково» верым кресаньык-фермер озанлык але экоферме маныт. Эн ончычак лач ты шонымашым илышыш шыҥдараш тӱҥалме. А  ик ий гыч тыште самырык-влаклан канаш экопарк кӱлеш манын умыленыт. Тушто кажне ийын у сылне верым ямдылат. Ты мландыште ондак сад участке-влак лийыныт, но тудым еҥ-влак шукертак кудалтен каеныт…

«Икымше ийын ме тышеч самосвал дене кышкен кодымо торым гына шупшыктенна. Моткоч шуко погынен ыле, эсогыл ты купан верыш июльыштат кудал пураш лийын огыл. Мландым тӧремденна. Вара ферме нерген шонаш тӱҥалынна. Эн ончычак герефорд урлык (англичан) ушкалым налынна, страус-влакым онченна. Тыгак венгр мангалица урлык сӧсна-влак ыльыч. Романовский урлык шорыкым, пастуший урлык пийым, декоративный казам, имньым налынна. Кызыт ынде пайдам пуышо вольыкым гына коденна. А ушкал  кӱтӱм австралийский келпи урлык пий орола», – каласкалыш Вадим Николаевич.

Кӱвар вес велысе агротуристический зонышто кӱтӱ коштеш, шудым солат, мӱкшотар уло. Тушко йоча-влак ача-авашт але посна экскурсий дене толын каят.

Промышленный зонышто вольык ден кайыквусо вӱта-влак улыт. Мийыме кечын электрический пастух йӧн дене авырыме ушкал-влак олыкышто коштыт ыле. Вадим Николаевич умылтарыш: тиде Швейцарийысе урлык ушкал шагалрак шӧрым пуа, но тудо нугыдо. Шыллан герефорд, ангус урлыкым ончаш сай. Кайыквусо-влак коклаште кӱркам, чывым, лудым, комбым ашнат.

Кроликын пӧртшӧ.

Сӱаным эртарынет?

Лач тидлан 200 веран банкет зал нылымше ий пашам ышта. Воктеныже «LOVE» возыман арт-объектым йӧнештарыме. Пычкемышыште тудо волгалтеш, сӧралын коеш. Тудын воктене мероприятийла годым кушташ лиеш. Тораште огыл амфитеатрым келыштарыме. Туштат кеч-могай пайремым эртараш йӧнан.

Ресторанлаште шке ончен куштымо пакчасаска дене сийлат. Ты вершӧрыштак куд теплицышт, пакчашт верланеныт. Тӱҥ шотышто киярым, помидорым, черри-помидорым, редискым, укропым да моло ужар шудым куштат.

Вӱд воктене сай фотозоным ыштыме, тушто кутырен шинчаш теҥгыл-влакым вераҥдыме. Тораште огыл вӱдыш ончен шинчаш пырням йӧнештарыме, тидлан мландым нӧлтымӧ. Тений шошым эше эн кугу чоҥгатам ыштыме. Вашке тушто кече шичмым, кеҥеж тымык йӱдым тылзым да шӱдыран кавам ончаш теҥгылым вераҥдат.

Сырым ыштат

2019 ийыште тыште экопарк ден экоферме зоно-влак коклаште чапле «Сыроварня» шочын шогалын.

Тушто чыла  кучылтын, сырым ыштат да шуктат. Пеҥгыде сырым пел ий гыч тӱҥалын кум ий дене шуктат. Тыште кум тӱрлӧ пӧлемыште камерлаште вӱдыжгылыкым да кӱлеш температурым компьютер терга.

Грант паша

В.Агафонов тиде комплексым ышташ манын, шке автодомжо дене (ораван пӧрт) ятыр путешествийыш миен, Европа мучко ончен коштын. Ик жап Голландийысе фермыште пашам ыштен, опытым поген. Еш фермым ворандарыме сомыллан 10 млн теҥгеаш грант полшен. Тунам Агафоновмыт ушкалым да оборудованийым налыныт. Кодшо ийынат грант почеш пашам шукташ конкурсым сеҥеныт. Туддене кум пӧртым чоҥаш палемденыт. Но ты 3 млн теҥге ик идалык гыч гына толын шуын. Илен-толын, тыште йоча площадкым ыштынешт.

 

Икманаш, канаш, жапым веселан эртараш шонышо, сыр кузе ышталтме нерген пален налаш кумылан еҥ-влакым экскурсийыш май гыч сентябрь мучаш марте вучат. А сӱанлан але вес мероприятийлан ончылгоч возалтса – тений тушто ятыр пайрем эртаралтын. Толза, Европышто лийме гаяк чучеш.

 

Эльвира Терентьева.