Озаҥ оласе марий ӱдыр-влак

Озаҥ олаште Рушарня школ уло. Тушко 13 йоча коштеш. Тыште нуно марла ойлаш, кушташ, мураш, тӱрлаш, сӱретлаш, марий йӱлам аклаш тунемыт. Тӱрлӧ конкурсышко ушнат. Теве шукерте огыл 5 ияш Арина Ибатиева ден 9 ияш Кристина Романова Калык-влакын икоян улмо кечылан да Марий Эл Республиклан 100 ий теммылан пӧлеклалтше «Шочмо эл нерген муро» регион-влак кокласе онлайн конкурсышто участвоватленыт да 3-шо верыш лектыныт. Конкурслан номерым Рушарня школышто марий йылмым туныктышо Алёна Токташова ямдылен.

Арина – чылт марий ӱдыр, марла сайын кутыра. Эше татар йылмым тунемеш. Вӱдыштӧ сӱретла, тыгай технике Эбру маналтеш. Мозаикым погаш йӧрата. Шке семынже эре мура.

Кристина марла умыла, изишак ойла. Тудо Озаҥ оласе 33-шо №-ан гимназийыште 3-шо классыште тунемеш. Рушарня школыш нылымше ий коштеш, сӱретла, француз йылмым тунемеш.