Советский район Изи Оваснур ял воктене турист маршрутышто «Оваснур — чодыра кундемын легендыже да илышыште мо лийме нерген каласкалымыже» театр сынан концертым ончыктеныт.
Мероприятийым Советский районысо тӱвыра пӧрт-влакын пашаеҥышт да ансамбль-влакын участникышт пырля эртареныт.
Районысо тӱвыра пӧлкам вуйлатыше Яков Аркадьевич Ефремов ончаш толшо-влаклан Кундыш кугызан кундемжын историйжым каласкален: сарыш ужатен колтымо корно, Йошкар армийлан чодырам ямдылыме да шолым волтымо нерген. Тыгак верысе легендын геройышт — Кундыш Кугыза да тудын Чачавий уныкаже — дене палдарен.
Йӱла почеш турпрограмме кол шӱр да шудо чай шолтымо да уна-влакым сиймыме дене мучашлалтын.
