Кызыт ял ден селалаште ятыр клубым петырыме нерген ойлат. Теве Волжский районысо Отымбал ялыште клуб петырналтынат тудо икмыняр жап пашам ыштыде шинчен. Тидыже самырык ӱдыр Наталья Васильеван кумылжым волтен. Ӱдыр чылажымат шке кидышкыже налын да шочмо-кушмо верышкыже пӧртылын, клубым уэш почын.
Шочмо-кушмо вер ӱжын
Наталья Отымбал ялыштак шочын-кушкын. Шарача школ деч вара Йошкар-Оласе И.С.Ключников-Палантай лӱмеш тӱвыра да сымыктыш колледжыш тунемаш пурен. Паша корныжо ты районысо Памар селасе тӱвыра пӧртыштӧ тӱҥалын. Тушто ӱдыр йоча-влак дене пашам ыштен, театрализоватлыме кружокым вуйлатен. Тыгак Карайысе калык театрыште режиссёр семын тыршен. Икмыняр жап тыге ыштымеке, ӱдыр Озаҥ олашке илаш куснен. Ты оласе Федеральный радиошколын курсыштыжо шинчымашыжым нӧлтен.
– Шочмо ялыш толмо годым клубын «йокрокланен» шинчымыжым ужын, чоным шӱлык кумыл авалтен. Мемнан ялыште кок пачашан чапле школ уло, а клуб яра шога. Молан тудым уэш почаш да пашам вораҥдараш огыл манын шоналтенам. Адакшым тидлан образованиемат уло. Тыге 2024 ий шошым йолташ ӱдырем дене клубышто пашам ышташ тӱҥалынна, – мутланымашым шуйыш самырык вуйлатыше.
Ик ий ышта
Отымбалысе школ ден клуб ик зданийыште верланеныт. Тушто кызыт тӱҥалтыш класс икшыве-влакым туныктат да йочасадыш ньога-шамычым кондыштарат. Ынде идалык наре тӱвыра паша ты кундемыште вораҥеш. Клубым Наталья Николаевна Васильева вуйлата, тудлан художественный вуйлатыше Юлия Валентиновна Ямбашева полша.
– Ялыш толмо почеш эн ончыч районысо клуб системым вуйлатыше деке шке шонымашем дене каенам. Мыйым сайын вашлийыныт да темлымашем дене келшеныт. Клубым шотыш кондаш вигак пижынна. Икымше кече гычак тӱрлӧ кружокым келыштаренна, тушко йоча-шамычым погенна. Кызыт мемнан дене «Мозаика», тыгак посна театральный грим да тӱрлӧ шӧрыныштӧ мастарлыкым тапташ кумылан-шамычлан кружок-влак пашам ыштат. Тушко Отымбал да пошкудо ялла гычат ятыр икшыве коштеш.
Клубым «Пасхальной радости сияние» икымше кугу мероприятий дене талук ончыч почынна. Тунамак «Кугече вуйшӱдыш» мастер-классым эртаренна. Ты тат шарнымашеш кодшо манын, лӱмын профессионал фотографым ӱжынна ыле. Калык моткоч сайын вашлийын. Нунын шинчаштышт куанымашым ужынам. Тидыже пашам ыштыме кумылем эшеат нӧлтен.
Клубышто утларакшым театрализоватлыме постановко-шамычлан тӱткышым ойырена. Калык ончыко икмыняр тыгай пашам аклаш луктынна. Йоча-шамычын модмыштым еҥ-влак йывыртен онченыт. Ончыкыжым концертым да моло мероприятийымат эртараш шонена, – каласкалыш вуйлатыше.
Конкурс кумылаҥда
Эртыше шыжым самырык специалист Марий Элысе Калык усталык рӱдерын ял ден селаласе клубым вуйлатыше-влаклан эртарыме конкурсыштыжо шкенжым терген. Отымбал тӱвыра пӧртын вуйлатышыже ты конкурсышто кумшо вер дене палемдалтын. Тыгак республик кӱкшытан «А ну-ка, ӱдыр-влак!» конкурсышто мастарлыкшым ончыктен. Тушто Натальям «артист койышан» номинацийыште эн ойыртемалтшыжлан шотленыт.
Васильеван ойлымыж почеш, кеч-могай еҥлан конкурс ончыко каяш полша, поснак — тӱвыра аланыште. Тыгай шонымаш денак Наталья шкенжым тӱрлӧ вере тергаш тырша. «А ну-ка, ӱдыр-влак!» конкурс тидлан – пример.
Тудын пашаж дене Волжский районысо клуб системым вуйлатышат йывырта. Ойлымыж почеш, яллаште Наталья гай чолга да ончыко шонен моштышо самырык специалист-шамыч эреак кӱлыт. Тудо тыгак Васильеван мутланыме жанрыште, монологым лудмаште, спектакльлаште модмо мастарлыкшым палемдыш. Сценыште шкенжым профессионал семын кучен мошта, кеч-могай образыш, рольыш вигак пура, мане.
Самырык вуйлатыше шке верыште улмыжым шижам манын ойлыш. Шуктымо сомылжо тудлан куаным конда, а тыгай годым лектышат лиеш, маныт. Тугеже Отымбал тӱвыра пӧрт – ӱшанле кидыште.
Н.Васильеван альбомжо гыч налме фото-влак.