Марий Эл радион увертарыме «Эр чолпан» рубрикыш ушнышо самырык мурызо-влак кокла гыч иктыже – Евгений Иванов. Тудо тыгаяк номинацийыште сеҥен.
Женя Волжский район Отымбал ялыште шочын-кушкын. Рвезе Озаҥ оласе А.Н.Туполев лӱмеш авиационный институтышто кӱшыл шинчымашым налын, магистрант. Специальностьшо дене инженер-программист. Кокымшо ий Озаҥ оласе авиационный заводышто пашам ышта.
«Идалыкысе муро-2019» фестивальыште рвезе самодеятельный композитор Вячеслав Осиповын семжылан да мутмастар Ирина Закиеван (Курочкинан) почеламутшылан возымо «А тый муралте» мурым мурен.
Тудо иканаште залым ылыжтен: мотор капкылже, яндар йӱкшӧ, шкенжым сеныште кучен моштымыжо, шыргыжал ончалмыж… дене. Шукертсек сценыште тыгай рвезым ужмо огылат, пуйто яндар южым шӱлалтымыла чучо, чылалан келшыш.
«Школышто тунеммем годым Отымбал клубым вуйлатыше Галя акай (Галина Дмитриева) концертыште мураш да вӱдышӧ лияш ӱжын ыле. Тылеч вара жап ятыр эртен, а мураш шонымаш эре чоныштем лийын. Ӱмаште «Ший памаш» муро фестивальыште шке вием терген ончышым. Фонограмме да семӱзар деч посна калык мурым, Володя Матвеевын репертуарже гыч «Шем шинчан таҥем» мурым да «А тый муралте» у мурым муренам. «За сценическое обаяние» номинацийыште палемдалтынам. Тиде диплом адакат кумылем ылыжтыш да у мурым Марий Эл радиошко пуышым. Ончыкшымат профессионал-влак дене пашам ышташ шонем. Мыйын шонымаште сем ден почеламут чонеш логалше лийшаш улыт», – ойла Евгений.
Самырык инженер Озаҥ олаште ила, кажне каныш кечылан шочмо ялышкыже кудалыштеш. Ешыште вич эрге гыч тудо эн изиже. Изаже-влак чыланат ешан улыт. Нунат ача-ава деке унала толын каят. «Ялыште мылам моткоч келша, пӱртӱс мотор да чон эре мӧҥгӧ шупшеш. Ача-авам сулен налме канышыште улыт, но пашашт ситышын: вольыкым ятыр ашнат. Нунат мурымемым колыштыт да шке семынышт йывыртат. Вет тукымыштына мурен-куштышо, семӱзгар дене шоктен моштышо иктат уке. Мый технический образованиян улам, садлан музыкальный грамотым палаш манын, тунемаш пураш кӱлеш, шонем», – ойла рвезе.
Ятыр артист дене палыме лийме деч вара вашкылым кучаш, нунын усталыкыштым утларак ужаш сай кече лийын. Рвезын у ошкылжылан меат волгыдо корным тыланена да кумылжо яндар кодшо манына. Евгений Иванов ончаш толшо еҥ-влаклан да тудым аклыше йолташыже-шамычлан кугу таум каласа.