График деч ончыч отпускыш каяш лиеш мо? Марий Эл Республикысе прокурорын полышкалышыже Ольга Лаптева умылтара:
– Тӱлалтме отпуск-влакын радамышт идалык тӱҥалме деч кок арня ончыч график почеш палемдалтеш. Ты графикым пашам темлышат, пашаеҥат шотыш налшаш улыт. Тыгодым южо пашаеҥ посна случай годым отпускым шонымыж семын шканже келшыше жапыште налын кертеш.
Пӧръеҥ-влак, ватышт декрет отпускышто улыт гын, ты жапыште отпускыш каен кертыт.
Военнослужащий-влакат пелашыштын отпускышт годым канен кертыт.
Мӱшкыран да изи йочан ӱдырамаш-влакын отпускыш декретный отпуск деч ончыч, тыгак отпуск деч вара вигак каяш правашт уло.
Закон почеш кеч-могай жапыште отпускым тыгай пашаеҥ-влак налын кертыт:
ийготыш шудымо-влак;
шуко шочшан ача-ава-влак, кугурак йочашт 12 ийым темен огыл гын;
18 ийым темыдыме инвалид-йочан ача-аваже;
«Российын почётан доноржо» знак дене наградитлалтше-влак;
Семипалатинскысе полигонышто ядерный испытанийлан кӧра 25 сЗв (бэр) деч утла ядерный облученийым налше еҥ-влак;
лучевой чер, тыгак Чернобыльысо катастрофылан кӧра радиацийым налме дене кылдалтше чер дене черланыше да тӧрланен лекше еҥ-влак;
боевой действийын ветеранже-влак;
Совет Ушем Герой, Россий Федераций Герой лӱмым налше еҥ-влак але Чап, Социалистический Паша Герой, РФ Паша Герой да Паша Чап орден-влакын тичмаш кавалерышт.
Пашам темлыше тиде радамыш пурышо еҥ-влакым нунын йодмышт почеш отпускыш огеш колто гын, шке правам аралаш манын, Марий Эл Республикысе Паша кугыжаныш инспекцийыш, прокуратурыш але судыш кайыман.