Отпускыш кӧ кая?

Азам ончымо шотышто отпускым ача-ава гына огыл, тыгак коча-кова але лишыл родо-влак налын кертыт.

Отпускыш лекташ йодмашым возыман, да тыгодым пособийым тӱлышт манын, йодмашым паша верышкат намиен пуыман.

Тылеч посна вес документ-влакат кӱлыт: йочан шочмо кагазше, йочан лишыл родыжо улмым пеҥгыдемдыме документ (мутлан, коча але ковалан шке йочаштын шочмо кагазышт), ача-ава тыгай отпускыш каен огытыл да пособийым огыт нал манме справке. Йочан лишыл родыжо пытартыш кок ийыште паша верым вашталтен гын, тылеч ончычсо паша вер гыч пашадар кугытым ончыктымо справкым налшаш.

Йочам ончаш отпускым икшывын кум ийым темымыж марте налаш лиеш, тыгодым пособийым 1,5 ийым темымешкыже пуат. Йоча дене шинчыше-влак паша верыштышт сокращенийыш огыт логал, тыгак тичмаш огыл паша кечылан пашаш лектын кертыт.