Кажне ийын ойыралтше отпускым окса компенсаций дене алмашташ лиеш мо?
Юл кундемысе регион-влак кокласе территориальный кугыжаныш паша инспекцийым вуйлатышын алмаштышыже Юрий ЛЕБЕДЕВ вашешта:
– Пашаеҥ кучылтдымо отпускшо олмеш окса компенсацийым налын кертеш, но южо годым веле:
паша гыч кайыме годым еҥлан кучылтдымо чыла отпускшылан окса компенсаций тӱлалтеш (РФ Паша кодексын 127-ше статьяжын 1-ше ужашыже);
пашаеҥын отпускшо 28 кече деч кужунрак шуйна гын, тудо, РФ Паша кодексын 126-шо статьяж дене келшышын, ик ужашыжым окса компенсаций дене алмаштен кертеш.
Кажне ийын ойыралтше тӱлыман отпуск-влакым иктыш ушымо але тудым вес идалыкыш кусарыме годым окса компенсаций дене идалык еда ойыралтше 28 кече деч утларак шуйнышо отпускын кажне ужашыжым але ты ужаш гыч кеч-мыняр кечыжым алмашташ лиеш.
Мӱшкыран ӱдырамаш ден 18 ияш марте ийготан пашаеҥ-влаклан идалык еда ойыралтше тӱлыман тӱҥ отпускым да ешарен пуымо отпускым, тыгак тазалыклан эҥгекым ыштен кертше да лӱдыкшӧ пашам шуктышо-влаклан тыгай условийыште пашам ыштымылан кажне ийын ешарен пуымо тӱлыман отпускым окса компенсаций дене алмашташ ок лий (тышке паша гыч кайыме годым кучылтдымо отпусклан, тыгак РФ Паша кодексыште палемдыме случай-влак огыт пуро).
Пашам темлышын пашаеҥын паша праважым пудыртымыж шотышто Юл кундемысе регион-влак кокласе территориальный кугыжаныш паша инспекцийын Марий Элысе пӧлкашкыже 8-902-432-77-60 («шокшо линий») номеран телефон дене йыҥгыртен але «Онлайнинспекция.рф» порталыште «Сообщить о проблеме» сервис гоч дистанционно шижтараш лиеш.
freepik.com сайт гыч налме фото.